Ытык кырдьаҕас Наум Слепцов cпортсменнарга эҕэрдэтин тиэртэ

Дьокуускайга «Кыайыы 50 сыла» успуорт дыбарыаһыгар шахмат-дуобат турнира 14-с төгүлүн ыытыллар.

Бу Аҕа дойду уоттаах сэриитин уонна успуорт бэтэрээнин, 101 саастаах Наум Трифонович Слепцов бирииһигэр ыытыллар күрэхтэһии. Манна, сыл ахсын үрдүк тэрээһиннээхтик ыытыллар күөн күрэс түһүлгэтигэр оҕолор да, кырдьаҕастар да түмсэн илин-кэлин түсүһэллэр.

Тэрээһин туһунан Улус.Медиаҕа Валентина Догоюсова суруйбут. Ол курдук, үөрүүлээх уонна долгутуулаах күрэхтэһии аһыллыытыгар, ытык кырдьаҕас Наум Трифонович күрэхтэһээччилэргэ туһаайан бу эдэр оҕолору сайыннарар, дьоҕурдаахтары булар сыаллаах-соруктаах ыытылларын бэлиэтээбит. Кини мантан чөмпүйүөннэр үүнэн-сайдан тахсыахтарын уонна өрөспүүбүлүкэлэрин киэн туттуутунан буолуохтарын сөп диэн эппит.

—Бу турнирга манна эһигини кытта турарбыттан үөрэбин. Мантан эдэр маастардар үүнэн-сайдан тахсыахтара, өрөспүүбүлүкэлэрин аатырдыахтара. Кэнники икки сылга шахмат өрөспүүбүлүкэбитигэр улаханнык сайынна, талааннаах эдэр оонньооччулар баар буоллулар. Кинилэр гроссмейстердары кытта тэҥҥэ оонньууллар. Сотору биһиги шахмакка улахан оонньооччуланарбыт буолуо диэн эрэнэбин. Барыгытыгар доруобуйаны баҕарабын, — диэбит ытык кырдьаҕас.

Наум Трифонович Слепцов — Аҕа дойду сэриитин кыттыылааҕа, үлэ уонна успуорт бэтэрээнэ, өрөспүүбүлүкэ хас да улууһун Бочуоттаах гражданина, «Якутянин года — 2020» бириэмийэ лауреата, «Почётный старейшина Республики Саха (Якутия)» бэлиэ хаһаайына.

СӨ шахмат Федерациятын Бэрэсидьиэнэ Владимир Егоров Наум Слепцов кыһамньытынан өрөспүүбүлүкэҕэ успуорт интеллектуальнай көрүҥнэрэ салгыы сайдалларын уонна эдэр ыччаты көҕүлүүллэрин ыйбыт.

— Биһиги быйыл Кыайыы 80  сылын бэлиэтиибит, ону сэргэ Наум Трифонович 101 сааһын. Онон бу турнир ордук улахан суолталаах. Үгэс курдук биһиги манна бэтэрээннэр сүүмэрдэммит хамаандаларын уонна ыччаттар сүүмэрдэммит хамаандаларын күрэхтэһиитин тэрийэбит. Быйыл 80  дуоскаҕа икки хамаанда күөн көрсөр. 40 дуоскаҕа шахматка, 40  дуоскаҕа дуобакка илин-кэлин түсүһэллэр.

Наум Слепцов үөрэх сайдыытыгар уонна физкультуура сайдыытыгар улахан кылаатын киллэрсибит ытык киһи. Кини «Отечественная война II степени» уордьаннаах, «За Победу над Японией» мэтээллээх, «Отличный пулеметчик» бэлиэлээх уо.д.а.

Бэтэрээни кытары хайдах билсибитин туһунан Арасыыйа Дьоруойа Родимир Максимов:

—Мин Наум Трифоновичтыын былырыын күһүн билсибитим. Онно сценаҕа бастакы тахсыым этэ. Киниттэн истиҥ тыллары истибитим. Ол күнү күндүтүк саныыбын. Билигин манна туран, 101 саас диэн улахан ытык саас буоларын бэлиэтиибин. Эһиил эмиэ бу курдук көрсүөххэ диэн этэбин уонна доруобуйаны баҕарабын, — диэн ытык кырдьаҕаска туһаайбыт.

Наум Трифонович 1924 сыллаахха кулун тутар 8 күнүгэр Таатта улууһугар Чөркөөххө төрөөбүт, учаастакка. Кини 64 сыл устата өрөспүүбүлүкэ алта оройуонугар оскуолаларга учууталлаабыт, завучтаабыт, дириэктэрдээбит. Ону сэргэ, биэс сыл колхуос бэрэссэдээтэлинэн үлэлээбит. Ытык кырдьаҕас 96 сааһыгар дуобакка успуорт маастарыгар кандидат буолар. Кини сыалы-соругу туруорунар уонна онно дьулуһар, туохха барытыгар көхтөөхтүк кыттарынан үтүө холобурунан буолар диэн иһитиннэриигэ этиллэр.

Валентина Догоюсова хаартыскаҕа түһэриилэрэ