«YUKI FEST» бэстибээл ыччаты түмтэ

Дьокуускайга А.Е.Кулаковскай аатынан норуоттар доҕордоһууларын дьиэтигэр «YUKI FEST» аниме-бэстибээл буолла.

«YUKI FEST» сүрүн соруга — дьон-сэргэ болҕомтотун тардыы, түмсүү, үөрүүлэрин үллэстии, доҕоттору булуу. Тэрийээччилэр ыалдьыттарга уонна оонньуу кыттыылаахтарыгар быыстапка тэрийдилэр, билиини-көрүүнү тургутар оонньуулары ыыттылар. Маны сэргэ, косплей куонкуруһа (көстүүмнэри кэтэн оонньууллар) ыытылынна. Бу куонкурус сыала — аниме дьоруойун көрдөрүү, билиһиннэрии. Куонкурус дьүүллүүр сүбэтин Айаал Федоров салайда. Кинини Just Ayaal диэн аатынан билэллэр. Дьон-сэргэ кинини «Мандалорец» сэрийээлтэн хараабыл куоппуйатын оҥорбутун, «Игра в кальмара» сэрийээлтэн түөрт миэтэрэлээх куукуланы, «Наруто» аниметтан уо.д.а. үлэлэринэн билэллэр.

Тэрээһиҥҥэ маны таһынан, «Dance Generation» брейк оскуолата брейк үҥкүүгэ маастар-кылаас ыытта.

А.Е.Кулаковскай аатынан норуоттар доҕордоһууларын дьиэтин пресс-сулууспата