Юлия Шилова: «Бастакы уонна түмүктүүр күҥҥэ дьон көхтөөхтүк кыттааччы»

Дьокуускай куорат 805-с №-дээх быыбардыыр учаастага бүгүн иккис күнүн үлэтин 8:00 ч. саҕалаата. 

Бэҕэһээ киэһэ бу учаастакка 157 быыбардааччы кытынна.
805-с №-дээх быыбардыыр учаастагын бэрэссэдээтэлэ Юлия Шилова быыбар этэҥҥэ баран иһэрин, нэһилиэнньэ куоластааһыҥҥа көхтөөхтүк кыттарын кэпсээтэ:
— Биһиги быыбардыыр учаастакпытыгар испииһэгинэн 943 быыбардааччылаахпыт. Онон учаастакпыт дьоҕус диэххэ сөп.
Биһиги учаастакпытыгар ханна тиийбит сирдэринэн куоластааһыҥҥа сайабылыанньанан 34 быыбардааччы испииһэгэ баар. Биһиэхэ өссө көтүрүллүбүт дьиэлэр олохтоохторо, сүрүн испииһэккэ суох буолан баран, эбии испииһэгинэн куоластыыллар.

Бэҕэһээ 18 сааһын туолан, Степан Александров диэн эдэр быыбардааччы кэлэн куоластаата. Киниэхэ биһиги быыбардыыр учаастакпыт сэмэй өйдөбүнньүк бэлэх туттарда. Бу эдэр киһи өрөспүүбүлүкэтин, дойдутун кэскилин туһугар бэйэтин быыбарын оҥордо, гражданскай иэһин төлөөтө. Биһиги киһиэхэ быыбар улахан суолталааҕын эттибит.
Уопсайынан эттэххэ, үс күннээх быыбарга дьон бастакы уонна үһүс күннэргэ көхтөөхтүк кэлээччилэр. Сайаапка быһыытынан дьиэҕэ куоластааһыҥҥа бэҕэһээҥи туругунан 4 сайаапка биэрбитэ. Маннык сайаапканы биһиги быыбардыыр учаастакпыт балаҕан ыйын 10 күнүн 14:00 ч диэри ыларын бэлиэтиэхпин баҕарабын.