ЮНЕСКО билиммит уһулуччулаах нэһилиэстибэтин Татарстааҥҥа билиһиннэрдилэр

Бүгүн, сэтинньи 25 күнүгэр, Саха Өрөспүүбүлүкэтигэр Олоҥхо күнэ бэлиэтэнэр. Бу күн Б.Ойуунускай аатынан Саха тыйаатыра  “Желанные берега Саха театра: от Лены до Волги”  гостуруолун түмүктэринэн пресс-кэмпириэнсийэ өрөспүүбүлүкэтээҕи Медиа-кииҥҥэ  буолла.

Саха тыйаатырын уус-уран салайааччыта Андрей Борисов кэмпириэнсийэни арыйарыгар 2005 сыллаахха сэтинньи 25 күнүгэр ЮНЕСКО олоҥхону аан дойду култууратын биир саамай чаҕылхай нэһилиэстибэтинэн биллэрбитин санатта.  2006 сыллаахха СӨ бэрэсидьиэнин Ыйааҕынан Саха Өрөспүүбүлүкэтигэр сэтинньи 25 күнэ Олоҥхо күнүнэн биллэриллибитэ, онтон ыла сыл аайы Олоҥхо күнэ, дэкээдэтэ бэлиэтэнэр. Бүгүн Ил Дархан Айсен Николаев Олоҥхо үһүс 10 сыла саҕаланарын, а.э.2026-2035 сылларга Олоҥхо сыла салҕанарын туһунан иһитиннэрдэ.

Олоҥхо тыйаатыра ЮНЕСКО киһи аймах уһулуччулаах нэһилиэстибэтинэн биллэрбит  саха олоҥхотун иккис 10 сылыгар, 20 сылыгар  анаан, Татарстан Өрөспүүбүлүкэтин Казань куоратыгар саха олоҥхотун билиһиннэрэн кэллэ. Ол туһунан пресс-кэмпириэнсийэҕэ кэпсээтилэр.

СӨ култуураҕа уонна духуобунай сайдыыга миниистирэ Афанасий Ноев эппитинэн, Татарстан Өрөспүүбүлүкэтигэр Саха сирин тыйаатырдарын гостуруоллара Росконцерт “Улахан гостуруоллар” уонна “Биһиги – Арассыыйа” федеральнай бырагыраамалар өйөбүллэринэн ситиһилиннэ.

Татарстан Өрөспүүбүлүкэтиттэн   Саха тыйаатыра, Олоҥхо тыйаатыра уонна СӨ Үҥкүү национальнай тыйаатыра биир күн мустаннар,  Галиаскар Камал аатынан Татаар судаарыстыбаннай академическай тыйаатырын сыанатыгар «Олонхо – вечное эхо Евразии»  театральнай туруорууну көрдөрдүлэр. Олоҥхо тыйаатыра Степанида Борисова туруорбут “Удаҕаннар” олоҥхо-испэктээгин уонна “Олоҥхо – вечное эхо Евразии” көрөөччүлэргэ билиһиннэрдэ.

Арассыыйа, норуоттар икки ардыларынааҕы тыйаатырдар бэстибээллэрин кыттыылааҕа Лена Оленова Татарстаҥҥа сырыыттан санаатын маннык үллэһиннэ:

-Казань куоракка Камал тыйаатырын таас курустаал курдук, сабыс-саҥа уораҕайын көрдүбүт-иһиттибит. Омуннаах олоҥхо оҕолоро көтөн тиийээт, күнүс 3 чаастан  Камал тыйаатырыгар Степанида Борисова “Удаҕаннар” олоҥхо-испэктээгин көрдөрдүбүт. Бу тыйаатыр хас да улахан саалалардаах, сыананы эргитэр-урбатар технологияларын сөҕө-махтайа көрдүбүт. Дьокуускайбытыгар саҥа дьиэҕэ киирээри сылдьар дьон, биһиги эмиэ маннык улахан уораҕайга оонньуохпут диэн үөрэн-көтөн, санаабыт өссө көтөҕүллэн кэллибит.

Киэһэ 7 чаастан бүтүн үс тыйаатыр холбоһон, “Могучее эхо Евразии” көрдөрөн, көрөөччүлэр махталларын ыллыбыт. Култуура маннык улахан түгэнэ инники да сылларга норуоттар икки ардыларыгар ситим салҕана туруоҕун кэрэһилээтэ.

Саха норуотун уһулуччулаах нэһилиэстибэтин – Олоҥхону билиһиннэрии норуоттар икки ардыларыгар бигэ сибээһи бөҕөргөтөргө уонна  саха омук  төрүт үгэстэрин сырдатарга көмөлөһөр суолталаах култуурунай тэрээһининэн буолла.