Юрий Петров «СВО-ҕа сааҕын биэр» аахсыйаҕа кытынна

Дьокуускай куорат баһылыгын солбуйааччы – куорат уокуругун дьаһалтатын аппараатын салайааччыта Юрий Петров «СВО-ҕа сааҕын биэр» аахсыйа чэрчитинэн бултуур саатын туттарда.

«Бу аахсыйаны Дьокуускай куорат уокуругун дьаһалтата Илин байыаннай уокуругу уонна Саха сиринээҕи Росгвардия управлениетын кытта бииргэ ыытар. Уостаах саа (гладкоствольнай) биһиги буойуннарбытыгар өстөөх дронун утары көмүскэнэр сэбинэн буолар. Аныгы кыргыһыы усулуобуйатыгар маннык саа биһиги убайдарбытыгар, бырааттарбытыгар, уоллаттарбытыгар улахан көмөлөөхтөр. Булчуттары 12-с калибрдаах сааларын уонна ботуруоннарын туттаран аахсыйаҕа кыттаргытыгар ыҥырабын», — диэтэ Юрий Петров.

Дьокуускай олохтоохторо 12-с калибрдаах уостаах сааларын маннык аадырыска туттарыахтарын сөп: Дзержинскай уул., 35/1, лицензионнай-көҥүллүүр үлэ салаата, үлэ күннэригэр 09:00 чаастан 18:00 чааска диэри. Туттарарга пааспар уонна саа докумуоннара наада буолаллар.

Туттарыллыбыт бары саалар анал байыаннай дьайыыга сылдьар байыаннайдарга ыытыллыахтара диэн Дьокуускай куорат дьаһалтатын пресс-сулууспата иһитиннэрэр.