Юрий Слепцов: «Кэлэр көлүөнэбитигэр болҕомтобутун уурдахпытына, норуоппут инникилээх уонна кэскиллээх буолара саарбаҕа суох»

Саха Өрөспүүбүлүкэтин Ил Дархана Айсен Николаев Анал этиитигэр Нам улууһун баһылыга Юрий Слепцов санаатын үллэстэр:

— Биһиги Ил Дархаммыт Айсен Николаев быйылгы Анал этиитин иһиттибит. Мин быйылгы Анал этиигэ кэлэр сылы Оҕо сылынан биллэрбититтэн олус үөрдүм. Биһиги кэлэр көлүөнэбитигэр болҕомтобутун уурдахпытына, норуоппут инникилээх уонна кэскиллээх буолара саарбаҕа суох. Онон Оҕо сыла биллэриллибитинэн биһиги олус үөрдүбүт уонна астынныбыт.

Оттон экэнэмиичэскэй-социальнай сайдыы хайысхаларыгар Арктика уонна Саха сирин соҕуруу өттүгэр болҕомто ууруллубута саамай сөптөөх. Оҥорон таһаарыы уонна билим сайдыытыгар, социальнай газификация улахан болҕомтотун уурда, саҥа саҕахтары торумнаата, онтон даҕаны атын соруктары туруорбута сөптөөх. Инвестиционнай бырайыактарга үбү-харчыны ыытарга этиитэ эмиэ олус суолталаах.

Бу барыта киһи туһугар оҥоһуллара биһигини үөрдэр. Онон биһиги, тыа улуустарын баһылыктара Ил Дархан этиитин биһирээтибит уонна олоххо киириитигэр күүспүтүн-уохпутун ууран үлэлиэхпит.