Юрий Трутнев: «10 сыллаах үлэбиттэн кыбыстыбаппын»

2013 сыллаахха бэрэсидьиэн Владимир Путин Уһук Илини сайыннарыы хайысхатын инники күөҥҥэ тутар туһунан биллэрбитэ. Онно Юрий Трутнев вице-премьерынан — Уһук Илиҥҥэ бэрэсидьиэн боломуочуйалаах бэрэстэбиитэлинэн анаммыта. Владивосток куоракка ыытылла турар Илиҥҥи экэнэмиичэскэй пуорум кэмигэр кини «Российская газета» хаһыакка интервью биэрдэ.

— Уон сыллааҕыта миэхэ Уһук Илиҥҥэ 3 тыһыынча тэрилтэни тэрийиэххит, 3 триллион солкуобай инвестицияны киллэриэххит диэбиттэрэ буоллар, бэйэм да итэҕэйиэм суоҕа этэ. Ол эрээри, бу билигин барыта туолла. Бу кэрчик кэмҥэ ыыппыт үлэбиттэн кыбыстыбаппын. Элбэх оҥоһулунна дии саныыбын. Ол эрээри, өссө да элбэх оҥоһулла илик, ол туһугар үлэлииргэ бэлэммит.

Үлэ миэстэтин таһаарыы, инвестициялары киллэрии курдук соруктарга былааммытын икки төгүл куоһардыбыт. 30 тыһыынча үлэ миэстэтин таһаарыахтаах этибит — 53 тыһыынча үлэ миэстэтин таһаардыбыт. Инвестиция көрдөрүүтүгэр былаан 1,6 триллион солкуобай этэ, билигин 3 триллиону киллэрдибит. Тыһыынчаттан тахса социальнай эбийиэк тутулунна. Онон Уһук Илини социальнай-экэнэмиичэскэй сайыннарыы национальнай бырагырааматын сүрүн тосхоллорун барытын толордубут дии саныыбын. Кыра көннөрүүлэр, холобур, пандемиянан сибээстээн, баар буолуохтарын сөп.

Билигин Уһук Илиҥҥэ 3 тыһыынча инвестиционнай бырайыак үлэлии турар. Аҕыйах сыллааҕыта бу сыыппараны ким да итэҕэйиэ суох этэ, — диэн кини кэпсээтэ.