Юрий Трутнев: Арктика куораттарын былааннарыгар инвестиция 1,3 триллион солкуобайга чугаһыаҕа

РФ Арктическай зонатын сүрүн куораттарыгар генеральнай былааннарга бүддьүөт инвестициятын кээмэйэ 1,3 триллион солкуобайга чугаһыаҕа.

Бу туһунан РФ Бырабыыталыстыбатын бэрэссэдээтэлин солбуйааччы — Арассыыйа Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев Аан дойдутааҕы Арктическай пуорум чэрчитинэн түмүктүүр пресс-кэмпириэнсийэҕэ эттэ.

Бу иннинэ Арассыыйа бэрэсидьиэнэ Владимир Путин Мурманскай уобаласка оробуочай сырыытын чэрчитинэн, Арассыыйа Арктическай зонатыгар баар сүрүн нэһилиэнньэлээх пууннар генеральнай былааннарын кытта билсибитэ. Саҥа бырайыактарга генеральнай былаан нөҥүө тардыллыахтаах инвестиция кээмэйэ 19 триллион солкуобайга тиийиэҕэ. Бу иннинэ 3,7 триллион солкуобай үбүлээһин структуратыгар бүддьүөт таһынан үп-харчы 2,2 триллион солкуобайга, федеральнай бүддьүөт үбэ-харчыта 0,9 триллион солкуобайга, 0,6 триллион солкуобай эрэгийиэннээҕи бүддьүөт үбэ буолара былааннаммыта.

Арассыыйа Уһук Илин сайдыытыгар министиэристибэтэ иһитиннэрбитинэн, Арктика зонатыгар баар 16 сүрүн нэһилиэнньэлээх пууннар генеральнай былааннарын олоххо киллэрии 3-тэн 5 триллион солкуобайга диэри үрдэтэн, 2035 сылга диэри барыаҕа. Маннык территориялар испииһэктэригэр Тиксии нэһилиэгэ уонна Саха сириттэн чугас сирдэр эмиэ киирэллэр.