Юрий Трутнев баһаарга, халааҥҥа бэлэмнэнии туһунан мунньаҕы ыытта

Бырабыыталыстыба бэрэссэдээтэлин солбуйааччы уонна Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев Магадаҥҥа эрэгийиэннэр баһаар  уонна халаан кэмигэр бэлэмнэрин туһунан мунньаҕы ыытта.

— Биһиги халаан, баһаар кутталлаах кэмэ саҕаланыытыгар эрэгийиэннэр баһылыктарын кытта өрүү көрсөн, айылҕа таһаарар саахалларын утары охсуһарга бэлэмнэрин туругун быһаарабыт. Өссө биир улахан суолталаах төрүөт баарын бэлиэтии көрөбүн: хас да хонуктааҕыта бэрэсидьиэн Владимир Владимирович Путин РФ бырабыыталыстыбатын чилиэннэрин кытта мунньах ыытта, онно баһаар сезонугар бэлэмнэнии уонна баһаары умуруоруу боппуруостара дьүүллэһилиннилэр. Забайкальеҕа ойуур баһаардарын балаһыанньата ураты болҕомтону эрэйэрэ этилиннэ. Баһаар сезонун боппуруостарыгар бары эрэгийиэннэр баһылыктара болҕомтолорун ууруохтаахтар. Эрдэттэн ханна дьоҥҥо уонна тутуу эбийиэктэригэр кутталы үөскэтэрин быһаарыахпытын наада, — диэн бэлиэтээтэ Юрий Трутнев.

Сыл саҕаланыаҕыттан Арассыыйа Ыксаллаах быһыыга-майгыга министиэристибэтэ Уһук Илиҥҥэ 483 ойуур баһаарын регистрациялаата. Баһаар 63%-на бастакы күн иһигэр умулларыллар. Айылҕа баһаардарын 69%-нын төрүөтүнэн   дьон ойуурга баһаартан сэрэхтээх буолуу быраабылаларын кэһиилэрэ буолар.

Уһук Илиҥҥи федеральнай уокурукка киирэр алта эрэгийиэҥҥэ: Бурятияҕа, Забайкальскай, Приморскай уонна Хабаровскай кыраайдарга, Амурскай уобаласка, Еврей автономнай уобаластарыгар баһаар сезона саҕаланна.

84 муниципальнай оройуоҥҥа баһаартан куттал суох буолуутун анал эрэсиимэ олохтонно. Забайкальскай кыраайга эрэгийиэннээҕи таһымҥа ойуурга ыксаллаах быһыы-майгы, Бурятия Өрөспүүбүлүкэтигэр уонна Еврей автономнай уобалаһыгар муниципальнай таһымнаах ыксаллаах быһыы-майгы эрэсиимэ биллэрилиннэ.

Бурятияҕа, Забайкальскай уонна Приморскай уобаластарга кураанах үүнээйини уматыы түмүгэр олорор дьиэлэргэ уонна олор аттыларыгар баһаар тахсыбыт түбэлтэлэрэ бэлиэтэннэ. Бурятияҕа сүөһү иитэр собуот уокка былдьанна. Ылыллыбыт миэрэлэр көмөлөрүнэн, айылҕа баһаардарыттан улахан хоромньу тахсыбата.

Саха сиригэр, Забайкальскай, Хабаровскай кыраайдарга, Магадаҥҥа парашютнай баһаарынай сулууспа үлэһиттэрин ахсаана эбилиннэ. Уопсайынан, Уһук Илиҥҥи федеральнай уокурукка, 2024 сылы кытта тэҥнээтэххэ, парашютнай баһаарынай сулууспа үлэһиттэрин ахсаана 352 штатынан улаатан, 2227 киһиэхэ тэҥнэһэр.

Уһук Илиҥҥи федеральнай уокурук Ойуур хаһаайыстыбатын управлениета эрэгийиэннэр баһаар сезонугар  бэлэмнэрин салгыы бэрэбиэркэлиир.

Уокурукка ойуур баһаарын умуруоруу үлэһиттэрин уопсай ахсаана 4158 киһи. Ойуур баһаарын утары охсуһар тиэхиникэ бэлэмин уопсай бырыһыана 98% тэҥнэһэр, ол иһигэр трактор уонна бульдозер  — 98,9 %, массыына тиэхиньикэтэ — 97,9 %, уонна вездеход — 98,7 %.

Халаан этэҥҥэ ааһыыта эмиэ ырытылынна. Муус устар иккис дэкээдэтин туругунан, Приморскай кыраай өрүстэрэ  болдьохтон уон хонук иннинэ аһылыннылар уонна ардахтан уу киириитэ салҕанар.

Бурятия Өрөспүүбүлүкэтин соҕурууҥҥу оройуоннарыгар, Забайкальскай кыраайга, Амур уонна Сахалин уобаластарыгар, Еврей автономнай уобалаһыгар өрүстэргэ мууһу алдьаныыта бэлиэтэнэр. Саха сиригэр, Магадаҥҥа, Чукоткаҕа, Камчатка хотугу өттүгэр халаан ыам ыйыгар, бэс ыйын саҕаланыытыгар буолар.

Уһук Илиҥҥи федеральнай уокурукка баар 545 гидропост тохтоло суох суһал кэтээн көрүүнү ыыталлара, халаан кэмигэр эбии 83 быстах пост арыллара былааннанар.

Сааскы уонна сайыҥҥы халаан уута куттала суох ааһарыгар бэлэмнэниигэ сэрэтэр миэрэлэр ыытыллаллар, ол иһигэр өрөмүөннээһин уонна биэрэги бөҕөргөтөр ​​үлэлэр, өрүс тардыыларын ыраастааһын уонна көннөрүү.

«Росгидромет» уонна «Росводресурсы» сүрүн улахан уу ылар сирдэрин  уонна сааскы халаан куттала суох ааһарын хааччыйыыга бэлэмнэрин сыаналаатылар.

Сэттэ эрэгийиэн халаан уутун куттала суох ааһарыгар бэлэмнэрин биллэрдилэр: Камчатка, Приморскай, Хабаровскай кыраайдар, Амурскай, Магадан, Сахалин уобаластара, Чукотка автономнай уокуруга.

— Уһук Илиҥҥи федеральнай уокурук эрэгийиэннэрэ баһаар уонна халаан буолуон сөп кутталлаах кэмҥэ бэлэмнэрин боппуруоһугар сыл аайы мунньах ыытабыт. Уһук Илиҥҥэ айылҕа кутталлаах дьайыылара ураты болҕомтону эрэйэллэр. Билигин Забайкальскай кыраайга кутталлаах баһаар балаһыанньата үөскээтэ. Нэһилиэнньэлээх пууннарга баһаар биэс килэмиэтиртэн чугаһыа суохтаах. Забайкальскай кыраайга маннык баһаар уон тоҕус баар. Дьон олоҕор куттал суоһуо суохтаах. Баһаары утары охсуһар минерализованнай балаһалары оҥоруу, пилота суох авиация көмөлөһүөхтээх. Онон үлэ элбэх, Уһук Илиҥҥэ баһаартан уонна халаантан куттала суох буолууну ситиһиэхтээхпит, — диэн мунньаҕы түмүктээтэ Юрий Трутнев.

Ил Дархан, бырабыыталыстыба пресс-сулууспата.