Юрий Трутнев байыаннай дьайыы кыттыылаахтарын кытары көрүстэ

Уһук Илиҥҥи уокурук  боломуочуйалаах бэрэстэбиитэлэ Юрий Трутнев Курскай уобаласка  баҕа өттүнэн барааччылары – Уһук Илин уокуругун боломуочуйалаах бэрэстэбиитэлистибэтин  аппараатын, Илиҥҥи сайдыы министиэристибэтин  үлэһиттэрин уонна ТОФ муора пехотатын 155-с гвардейскай биригээдэтин байыастарын кытары көрүстэ.

“Билигин биһини дойдубутун номоххо киирбит  муора пехотатын 155-с гвардейскай биригээдэтин байыастара уонна биир идэлээхтэрбит, судаарыстыбаннай сулууспалаахтар көмүскүүллэр. Курскай уобалаһы харыстыырга уонна босхолуурга инники кирбиигэ сылдьар байыастарга  наадалааҕы барытын  сайаапканы тутаат да тириэрдии олус суолталаах. Биһиги Арассыыйа Оборонаҕа министиэристибэтин уонна Арассыыйа үтүө саналаах тыһыынчанан дьонун кытары барытын оҥоробут уонна тириэрдэбит”, — диэтэ Юрий Трутнев.

Сэби-сэбиргэли, анал таҥаһы-сабы Илиҥҥи байыаннай уокурук Донбаска баар байыаннай сулууспалаахтара, мобилизованнайдар уонна баҕа өттүнэн барбыттар туттулар. Байыастарга “Патриотическай” ТОР тэрилтэлэрин бородууксуйаларын биэрдилэр. Кинилэр Саха сириттэн эндуро  матасыыкыллары, Забайкалье кыраайыттан FPV-дроннары, Саха сиринээҕи «ЯКТ-СОКОЛ” ХЭО-тан үрдүк кыамталаах снегоболотоходтары туттулар. Маннык тиэхиньикэ байыаннай дьайыы сиригэр тиһигин быспакка ыытыллар.

«Биһиги байыастарбытыгар уопсай өйөбүл наада. Ким эрэ пуруоҥҥа гуманитарнай көмөнү оҥорор,  сорохтор саҥа эрэгийиэннэр сирдэрин-уоттарын чөлүгэр түһэрэллэр, ким эрэ инники кирбиигэ сылдьар байыастар дьиэ кэргэттэригэр баҕа өттүнэн көмөлөһөр. Кырдьыгынан этэбин, биһиги билигин баҕа өттүнэн барааччылар төрдүс бөлөхтөрүн бэлэмниибит. Хас биирдиибит тус кылаатыттан Арассыыйа инникитэ тутулуктаах”, — диэн Юрий Трутнев бэлиэтээн эттэ.