Юрий Трутнев байыаннай дьайыыга баран кэлбит судаарыстыбаннай сулууспалаахтар этэрээттэрин көрүстэ

Бырабыыталыстыба бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев көрсүһүүгэ сырытта.

Кини байыаннай дьайыыга баҕа өттүлэринэн баран кэлбит судаарыстыбаннай сулууспалаахтар этэрээттэрин кытта көрүстэ. Бу туһунан боломуочуйалаах бэрэстэбиитэлистибэ пресс-сулууспата иһитиннэрэр.

Этэрээт сыл аҥаарын анараа өттүгэр тэриллибитэ. Онно 27 киһи киирбитэ: Уһук Илиҥҥи федеральнай уокурукка боломуочуйалаах бэрэстэбиитэл аппараатын, Уһук Илини сайыннарыы министиэристибэтин уонна тоҕус эрэгийиэн үлэһиттэрэ (Бурятияттан – 2, Саха сириттэн – 4, Забайкальеттан – 3, Камчаткаттан – 2, Приморьеттан – 2, Хабаровскай кыраайтан – 1, Сахалин уобалаһыттан – 3, ЕАУо – 2, Чукоткаттан – 3). Баҕа өттүнэн барааччылар икки хайысханан (Курскай, Донецкай) үлэлээтилэр, БПЛА араас модификациятынан ВСУ күүһүн уонна сириэстибэтин чуҥнаан көрдүлэр. Баҕа өттүнэн барааччылар бары “АБДь кыттыылааҕа”  Арассыыйа оборуонаҕа министиэристибэтин мэтээлинэн наҕараадаланнылар, оттон Курскай бөлөх чилиэннэрэ (21 киһи) эбии “Курскай уобалаһы көмүскээһин иһин” мэтээллэри туттулар.

“Эһиги үлэҕит уһун кэмҥэ өйдөбүл буолан хааларыгар эрэнэбин. Бу олоҕу, бары бииргэ ыытар үлэбитин атыннык ылынаргытыгар көмөлөһүөҕэ. Кини хайдах курдук ирдэнэрин өйдүөххүт. Баҕар, кыратык кытаанах буолуоххут. Бу эмиэ нуорма. Маны Арассыыйа барыта, дьиэ кэргэҥҥит өйдөөн хаалыаҕа. Бүгүн Арассыыйаны көмүскүүргэ бэлэммит диэбэккэ, көмүскээтибит диэн бигэтик этиэххитин сөп. Онон барыгытыгар махтанабын. Билигин саҥа бөлөх бэлэмнэнэ сылдьарын билэҕит. Кыайыыны чугаһатарга күүспүтүн барытын ууруохпут”, – диэн Юрий Трутнев эттэ.

Байыаннай оҥоһугу саҥардыыга уонна кэҥэтиигэ анаан “Патриотическай” урутаан сайыннарыы территорията тэриллибитин эттэ.

“Бары оҥоһуктар фроҥҥа тэҥнээх усулуобуйаҕа тургутууну ааһаллар, онтон ВВО чааһыгар тириэрдиллэр. 2023-2024 сылларга байыаннай дьайыы сиригэр 22,5 тыһ. оҥоһугу номнуо ыыттылар, өссө 13 тыһ. ыытарга бэлэмнииллэр, 27 тыһ. тэрили оҥорон бу сыл бастакы кыбартаала түмүктэниэр диэри тириэрдиэхтэрэ”, – диэн Юрий Трутнев чопчулаата.

“Былырыын муус устарга Юрий Петрович Трутнев байыаннай дьайыы сиригэр көмө оҥорор соруктаах Уһук Илин судаарыстыбаннай сулууспалаахтарын үһүс этэрээтин таҥар туһунан сорудаҕы туруорбута. Каадырдары таҥарга уонна этэрээти түмэргэ биэс ый кэриҥэ барбыта. Бу утарылаһааччы Курскай уобалаһыгар саба түһүүтүн кытта сөп түбэспитэ. Ол иһин биһиги сүрүн сорудаҕы онно толордубут. Этэрээккэ 27 федеральнай сулууспалаах киирбитэ. Атырдьах ыйын ортотугар Курскай уобаласка барбыппыт. Сыл аҥаарын устата байыаннай дьайыы зонатыгар байыаннай сорудаҕы толордубут. Мин санаабар, этэрээт кини иннигэр туруоруллубут сорудаҕы барытын толордо, бары састаабынан гражданскай үлэлиир миэстэтигэр төнүннэ. Дойду кыһалҕаҕа кыһарыйтарар кэмигэр, ордук байыаннай кыһалҕаҕа, ханнык баҕарар эр киһи дуоһунастаах балаһыанньатыттан тутулуга суох Аҕа дойдутун көмүскүү барыахтаах. Оттон чунуобунньук икки бүк эппиэтинэстээх. Кини судаарыстыбаннай сулууспалаах. Судаарыстыба киниэхэ үлэни, хамнаһы, уопсастыбаҕа балаһыанньаны биэрбитэ. Онон ирдэнэр буоллаҕына кини дойдутун көмүскүүр  иэстээх”, – диэн этэрээт чилиэнэ, аэроразведка бөлөҕүн хамандыыра, Уһук Илин федеральнай уокурукка Бэрэсидьиэн боломуочуйалаах бэрэстэбиитэлин солбуйааччы Михаил Каган бэлиэтиир.