Юрий Трутнев байыаннай эпэрээссийэ инники кирбиитин байыастарыгар бинтиэпкэлэри, саа сэбин, тэрили тиксэрдэ

РФ Бырабыыталыстыбатын бэрэссэдээтэлин солбуйааччы – Уһук Илин федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев байыаннай эпэрээссийэ ыытыллар сиригэр Донецкай Норуодунай Өрөспүүбүлүкэҕэ Арассыыйа Аармыйатын хамандыырдарын уонна байыаннай сулууспалаахтарын, ол иһигэр, Уһук Илин уокуруктан сылдьааччылары кытта көрүстэ.

“Биһиги Донецкай Норуодунай Өрөспүүбүлүкэҕэ тиһигин быспакка кэлэбит. Уһук Илин эрэгийиэннэр саҥа эрэгийиэннэр оскуолаларын, уһуйааннарын, балыыһаларын саҥардыыга көмөлөһөллөр. Ону таһынан, Уһук Илин волонтердара үлэлииллэр. Пуруоҥҥа Уһук Илинтэн сылдьар дьон дойдубут тутулуга суох буолуутун туһугар туруулаһарга көмөлөһөллөр. Хамандыырдары, байыастары кытта көрсөбүт, инники кирбиигэ элбэхтик сылдьабыт. Пуруоҥҥа түүҥҥү уонна күнүскү оҥоһуктаах 177 снайперскай тэрили илтибит. Өссө радиоэлектроннай охсуһуу тэрилин, саа сэбин, багги, 200 кэриҥэ беспилотнигы. Байыастар хотоллорун уонна тыыннаах хаалалларын туһугар көмөлөһөр ирдэнэр”, — диэн Юрий Трутнев этэр.

Вице-премьер байыаннай дьайыы буола турар сиригэр тиийэн, байыаннай сулууспалаахтарга оҥоһуллар көмө чахчы суолталааҕын тус бэйэтинэн көрбүтэ. Чуолаан, 14-с туспа гвардейскай биригээдэ байыастарын кытта көрүстэ. “Байыастарынан киэн туттарбытын, кинилэр толорор үлэлэрин иһин махтанарбытын биллэрэбин уонна күүспүт тиийэринэн көмөлөһө сатыыбыт. Бу сырыыга аҕалбыт тэриллэрбитин байыастар сакаастарынан хомуйан илтибит, балары туһаналлар. Снайпердар икки бөлөхтөрө баара. Кинилэр 308-с калибры тутталлар. Түүҥҥү уонна күнүскү сыаллаах 338 тэрили биэрдибит. Үксүгэр пуруоҥҥа сырыыбытыгар 120-150 мөл. солк. суумалаах таһаҕаһы илдьэбит. Уопсайа, 1” млрд. 200 мөл. солк. суумалаах сэрии сэбин, тиэхиньикэни уонна тырааныспары аҕаллыбыт. Хамандыырдары кытта ыкса сибээстээхтик үлэлиибит, ол иһин байыаннай сорудахтары толорууга чопчу ирдэнэр тэрили аҕалабыт”, — диэн вице-премьер кэпсиир.

Байыаннай сулууспалаахтарга, мобилизацияламмыттарга уонна баҕа өттүнэн кыттааччыларга дойду өйөбүлэ улахан суолталаах. “Байыастар соҕотох буолбатахтарын, кинилэр тустарыгар кыһанарбытын, күүтэрбитин билэллэр. Бэҕэһээ биир байыаһы көрсөн багги уонна атын тиэхиньикэ биэрдибит. Кини утарсааччы алта сөмөлүөтүн уонна үс бөртөлүөтүн суулларбыт.  Киһи эрэ сөҕөр түмүгэ. Кини ону биһиги көһө сылдьар ракетнай комплекспытынан ситиспит. Байыас дьоруойдуу быһыыны оҥорбута көстөн турар. Маннык дьон тыыннаах хаалалларын туһугар туруулаһыахтаахпыт”, — диэн Юрий Трутнев бэлиэтиир.

Боломуочуйалаах бэрэстэбиитэл тиэхиньикэни уонна тэрили илдьэр, көмөлөһөр эрэ сорук турбатын, дойдуга туһалаах тэрили оҥорон таһаарыы эмиэ ирдэнэрин ыйар. Ол курдук, байыаннай эпэрээссийэ буола турар сиригэр илдьибит багги Хабаровскайга оҥоһуллубут. Уһук Илин бары 11 эрэгийиэнигэр квадрокоптер араас мадьыалын таҥар уонна оҥорор этии киллэрбиттэрин иһитиннэрэр. Радиоэлектроннай систимэни кытта охсуһар тэрилинэн эмиэ дьарыктаныахпыт диэн этэр.

Вице-премьер оробуочай сырыытын кэмигэр ДНӨ “Каскад” суһал-бойобуой тактическай түмүү байыастарын кытта көрүстэ, “Мариуполы босхолооһун иһин” 21 мэтээли туттарда.