Юрий Трутнев байыастарга Саха сирин тиэхиньикэтин туттарда

РФ Бырабыыталыстыбатын бэрэссэдээтэлин солбуйааччы – Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев бу күннэргэ байыаннай дьайыы байыастарыгар Саха сириттэн аҕалыллыбыт «ЯКТ-СОКОЛ»40 квадроциклы уонна “Тимир АТ” 40 электрическэй матасыыкылы туттарда.

Ону таһынан байыаннайдарга Приморьеҕа оҥоһуллубут 150 тепловизионнай прицелы; Забайкалье кыраайыттан 2 тыһыынчаттан тахса FPV-дрону; Бурятияттан “Медоед»  10 болотоходу уо.д.а. тиксэрдилэр.

«Биһиги тиэхиньикэлэри, бастатан туран, Уһук Илиҥҥи байыаннай уокурук бары подразделениеларыгар биэрдибит. Бу сырыыга аҥаардас 90-тан тахса массыына тырааныспарын тириэртибит. Ити барыта Уһук Илин тэрилтэлэригэр хомуллубута. Биһиги технологиялары сайыннарабыт, саҥа тэриллэри оҥоро үөрэнэбит уонна, бастатан туран, байыастарбытыгар көмөлөһөбүт. Биһиэхэ баар “Патриотическай” ТОР көмөтүнэн пуруоҥҥа наадалааҕы туох кыалларын барытын салгыы оҥоруохпут. Уһук Илиҥҥи байыаннай уокурук  командующайын кытары кэпсэппиппэр оборона миниистирэ Андрей Рэмович Белоусов  биһиги тиэхиньикэбитин Арассыыйа атын тэрилтэлэрин уонна Кытай тиэхиньикэлэрин кытары тэҥнээн көрбүтүн уонна биһиги матасыыкылларбыт ордуктарын бэлиэтээбит. Мин эмиэ оннук саныыбын”, — диэтэ  Юрий Трутнев.

Санатан эттэххэ, быйыл “ЯКТ-Сокол” уонна  эндуро матасыыкыллары “Тимир Ат”   тэрилтэлэр РФ байыаннай күүстэрин үрдэтиигэ биллэр кылааттарын иһин, “Уһук Илин сулуһа” бириэмийэнэн бэлиэтэммиттэрэ.