Юрий Трутнев: “Биһиги сорукпут – Арассыыйа күүстээх буоларын ситиһии”

РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокуругун боломуочуйалаах бэрэстэбиитэлэ Юрий Трутнев уонна Ил Дархан Айсен Николаев “ВОИН” киин салалтатын кытта көрүстүлэр, киин Дьокуускай куораттааҕы филиалын үлэтин ырытыстылар.

“ВОИН” киини сайыннарыыга Арассыыйа Бэрэсидьиэнэ Владимир Владимирович Путин биэрбит сорудаҕынан үлэ салҕанар. Күн бүгүн “ВОИН” киин 21 филиала бэлиэтэннэ, бу былырыыҥҥы сыллааҕар икки төгүл элбэх. “ВОИН” киин үлэтэ саҕаланыаҕыттан анал бырагырааманан 400 инструкторы бэлэмнээтибит, итинтэн улахан аҥаара байыаннай дьайыы бэтэрээннэрэ, ол иһигэр анал байыаннай эпэрээссийэ бэтэрээннэрэ. Киин тэриллиэҕиттэн 35 тыһ. уол, кыыс үөрэҕи ааста. Итинтэн “Эдэр дьоруойдар кэмнэрэ” сайыҥҥы байыаннай-патриотическай симиэнэ көрүҥүнэн үөрэҕи 14-18 саастаах 20 тыһ. тахса оҕо ааста. Сыл түмүктэниэр диэри киин өссө 10 тыһ. оҕону, ол эбэтэр 2024 сыл устата дойду үрдүнэн барыта 30 тыһ. эдэр дьону бэлэмниэҕэ. Саха сиринээҕи филиал үлэтин биһирииллэрин биллэрэллэр. Бэҕэһээ Камчаткаҕа “ВОИН” киин үлэһиттэрин кытта көрсүбүтүм. Биһиги барыбыт сорукпут – бэлэмнэнии үүнэр көлүөнэни иитэрин таһынан, дойдубутун эмиэ күүстээх оҥоруохтаах” –  диэн көрсүһүү саҕаланыыта Юрий Трутнев эттэ.

“ВОИН” киин дойду Үөрэҕириитин министиэристибэтин кытта сөбүлэҥ түһэрсибитэ, ол иитинэн “Основы безопасности и защиты Родины” саҥа биридимиэти үөрэтэр преподавателлэр идэлэрин таһымын үрдэтэллэр. Саха сиринээҕи филиалга тустаах бырагырааманан бэлэмнэниини номнуо  208 педагог ааста.

Дьокуускай куоракка баар “ВОИН” киин филиала быйыл муус устартан үлэлиир. Ил Дархан Айсен Николаев ыччаты патриоттуу тыыҥҥа иитиигэ киин улахан оруоллааҕын бэлиэтээн туран, кэмигэр аһыллыбытын ыйда. Бу кэм устута номнуо тыһыынчаттан тахса курсаны бэлэмнээбиттэр.

“Саха сирэ Арассыыйаҕа биир бастакынан “Воин” киини арыйбыта. Күн бүгүн өрөспүүбүлүкэҕэ байыаннай-патриотическай иитии систиэмэтигэр дьоһун миэстэни ылар. Сыл аҥаара кэмҥэ 1100-тэн тахса курсаны бэлэмнээтилэр, билигин 335 киһи үөрэнэр. Кинилэр огневой, тактическай уонна инженернэй бэлэмнэниини ааһаллар, сибээһи хааччыйыыны, тактическай мэдиссиинэ сүрүн өттүн,  пилота суох көтөр аппарааттары көтүтүүнү үөрэтэллэр, спортивнай-тактическай оонньуулары оонньууллар, Арассыыйаҕа куттал суох буолуутугар билиини ылаллар. Саха сиринээҕи “Воин” киин – патриоттар дьиҥнээх оскуолалара, оттон оҕолор манна иҥэриммит сатабыллара Аҕа дойдуну көмүскээччилэргэ тугунан да кэмнэммэт” – диэн Айсен Николаев бэлиэтээтэ.

“ВОИН” киин иһитиннэрбитинэн, Саха сиринээҕи салаа бэс ыйын 10 күнүттэн атырдьах ыйын 23 күнүгэр диэри “Эдэр дьоруойдар кэмнэрэ” сайыҥҥы симиэнэни тэрийэн ыыппыта. Хас биирдии симиэнэ 21 күннээх. Бу кэм устата 14-17 саастаах оҕолор байыаннай-прикладной сатабылга үөрэммиттэрин таһынан, патриотическай тэрээһиннэргэ кыттыбыттара, “Зарница 2.0” оонньообуттара, биллиилээх дьону кытта көрсүбүттэрэ, ол иһигэр Арассыыйа Дьоруойдарын уонна анал байыаннай дьайыы кыттыылаахтарын кытта. Сайын устата бу симиэнэлэргэ эрэгийиэнтэн барытыттан 434 курсант кытынна.

Алтынньы 14 күнүттэн филиал эрэгийиэннээҕи ДОСААФ уонна Дьокуускайдааҕы автодорожнай тиэхиньикум баазаларыгар курсаннары үөрэтэр былааннаах. Былаан быһыытынан бэлэмнэниини 130 киһи ааһыаҕа.

Санатан эттэххэ, “ВОИН” ыччаты байыаннай-спортивнай уонна патриотическай тыыҥҥа иитэр киин Арассыыйа Бэрэсидьиэнэ Владимир Путин сорудаҕынан тэриллибитэ. Итиэннэ оскуола үөрэнээччилэрин, устудьуоннары патриотическай тыыҥҥа иитэр, байыаннай-спортивнай бэлэмнэниигэ үөрэтэр.

Атырдьах ыйын саҕаланыыта дойду баһылыга “ВОИН” киин филиалларын дойду бары эрэгийиэннэригэр сайыннаран, ыччаты иитиигэ анал байыаннай дьайыы кыттыылаахтарын сыһыарарга эппитэ.