Юрий Трутнев “бырабыыталыстыба чааһын” иитинэн Судаарыстыбаннай Дуумаҕа дакылааттаата

РФ Бырабыыталыстыбатын Бэрэссэдээтэлин солбуйааччы — Уһук Илиҥҥэ РФ Бэрэсидьиэнин боломуочунайа Юрий Трутнев дойду Арктикаҕа зонатын социальнай-экэнэмиичэскэй уонна инфраструктураҕа сайдыытын сүрүн боппуруостарыгар аналлаах “бырабыыталыстыба чааһын” иитинэн Судаарыстыбаннай Дуума мунньаҕар дакылаат оҥордо.  

“Бүгүн биһиги Арктика сайдыытын – РФ Бэрэсидьиэнэ Владимир Путин геостратегическай сиринэн быһаарбыт сирин ырытыһабыт. Арктика сайдыытыттан биһиги дойдубут эрэ буолбакка, бүтүн аан дойду кэскилэ тутулуктаах. Арктика сиртэн хостонор баайын саппааһын, муора хотугу пуордун, байыаннай-стратегическай кыаҕын туһунан номнуо этэн турабыт. Полярник күнүгэр Арассыыйаҕа Арктика арыллыытыгар, арктическай сиринэн байарыгар, улаатарыгар өҥөлөөх дьону ахтан ааһар иэстээхпит. 500-тэн тахса сыл устата Арассыыйа – аан дойду инники күөҥҥэ сылдьар арктическай державата. Арассыыйа чинчийээччилэрэ уонна бастакынан суолу арыйбыттар – Дмитрий Герасимовтан уонна Семен Челюскинтан саҕалаан Иван Папаниҥҥа, Артур Чилингаровка тиийэ Арктиканы баһылааһыны, сайыннарыыны хааччыйбыттара” – диэн Юрий Трутнев эттэ.

Кини бүгүн Арктикаҕа сиртэн хостуур уустук бырайыактар олоххо киирэллэрин, үрдүк технологиялаах тэрилтэлэр, убатыллыбыт айылҕа гааһын оҥорор собуоттар тутуллалларын, билим аныгы ыстаансыйалара, уста сылдьар атомнай ыстаансыйалар тэриллэллэрин бэлиэтээтэ.

“Арассыыйа субъектарын дохуоттара үрдээн эрэллэрэ улахан суолталаах дии саныыбын. Бу харчыны мэдиссиинэҕэ, суолга, оскуолаҕа уонна дьон атын ирдэбилигэр туһаныахха сөп. РФ Арктика зонатын субъектарын консолидированнай бүддьүөтүн дохуокка кииритиин уопсай кээмэйэ 70% кэриҥэ үрдээтэ. Кэлиҥҥи 5 сылга национальнай бырайыактар уонна бэрэсидьиэн единэй субсидиятын олоххо киллэрии иитинэн Арктикаҕа 60-тан тахса саҥа балыыһа, поликлиника, 48 оскуола, уһуйаан, 17 успуорт киинэ тутулунна. Мурманскайга уонна Архангельскайга университеттар саҥа кампустарын тэрийии туһунан быһаарыы ылылынна” – диэн эттэ.

Ону тэҥэ, бары маастар-былааннар бэлэмнэммиттэр, Норуоттар икки ардыларынааҕы Арктика пуорумугар Бэрэсидьиэҥҥэ иһитиннэриллибиттэрин бэлиэтиир.

Бу туһунан Саха Өрөсүүбүлүкэтин официальнай порталыгар суруйаллар. Сиһилии манна ааҕыҥ.