Салгыы
Юрий Трутнев: “Дьааҥы улууһугар даамба тутуллуоҕа”

Юрий Трутнев: “Дьааҥы улууһугар даамба тутуллуоҕа”

Ааптар:
22.07.2022, 12:00
Бөлөххө киир:

“Халаан уутун сэрэтиигэ Уу ресурсаларын федеральнай агентствота сүрүн оруолу ылыахтаах этэ. Мунньах түмүгүнэн бу агентство хоруйун астымматым”, – диэн бэлиэтиир РФ бэрэсидьиэнин Уһук Илиҥҥи федеральнай уокурукка боломуочуйалааҕа-вице-премьер Юрий Трутнев бүгүн Дьокуускайга ыыппыт мунньаҕын кэнниттэн.

Мунньахха, бастатан туран, халаан уутуттан эмсэҕэлээбит дьоҥҥо туох көмө оҥоһуллан эрэрин, эбийиэктэри чөлүгэр түһэрии туһунан кэпсэттибит. Бэҕэһээ Дьааҥыга сылдьан барытын көрөн-истэн кэлбиппит, олохтоохтору кытары көрсөн кэпсэппиппит”, – диэн этэр кини мунньах кэнниттэн суруналыыстары кытары көрсүһүүгэ.

Санатан эттэххэ, Юрий Петрович Саха сиригэр иллэрээ күнтэн үлэлиир. Бэҕэһээ Дьааҥы улууһугар сылдьан нэһилиэктэри көрбүтэ, олохтоохтору кытары көрсөн балаһыанньаны билсибитэ. Онно олохтоохтор, бастакы уочарат, даамба тутуутун туруорсубуттара.

Даамба тутуутун туһунан кэпсэтии барбыта. Бу боппуруоһу, сылын аайы көтөхпөт курдук, бырабыыталыстыба таһымыгар туруоруохпут. Онон Дьааҥы улууһугар даамба тутуута быһаарыллыаҕа дии саныыбын, – диэн иһитиннэрэр Юрий Трутнев.

Даамба тутуутугар даҕатан вице-премьер бүгүҥҥү мунньах кэнниттэн Уу ресурсаларын федеральнай агентствотын (“Росводресурсы”) үлэтин сэмэлээтэ.

Ханнык баҕарар ыксаллаах быһыы-майгы кэнниттэн киһи түмүгү таһаарар. Бу түмүктэринэн ылыллыбыт миэрэлэр төһө сөптөөхтөрө, сыыһалара тахсан кэлэр. Халаан уутун туһунан эттэххэ, манна нэһилиэнньэлээх пууннары харыстыыр сыалтан даамбалары тутуу барыахтаах этэ. Дьааҥы улууһугар олохтоохтук оҥоһуллубут даамба суоҕа тута билиннэ. Быстах кэмҥэ диэн оҥоһуллубут тутууну уу биирдэ сотон ааста. Бүгүҥҥү мунньахха даамба тоҕо тутуллубатаҕын туһунан Айылҕа ресурсаларын министиэристибэтиттэн, “Росводресурсы” агентствоттан ымпыгар-чымпыгар тиийэ ыйыталастым. Кырдьыгын эттэххэ, ол хоруйдартан мин астымматым. Элбэх киһи олорор сирдэригэр даамба тутуллуохтаах диэн этэллэр. Ол баҕар сөп буолуо эрээри, Дьааҥы улууһугар даамба тутуллубат диэн буолбатах. Халаан уутун эрдэттэн сэрэппит ордук дуу эбэтэр халаан уутун содулун туоратыыга харчы куппут дуу? Онон бу боппуруостар барыта салайааччыга туһаайыллаллар. Өскөтүн “Росводресурсы” салайааччыта кыайан бу боппуруоска хоруйдаабат буоллаҕына, үлэтиттэн уурайбыта судургу, – диэн эттэ.

Түмүккэ даамба үбүлээһинин туһунан этиитигэр Юрий Петрович: “Даамбаны тутууга үбү-харчыны биир сиргэ түмүү барыахтаах. Уһук Илин эрэгийиэҥҥэ барытыгар биир ситимнээх үлэ барыахтаах. Туспа биир эрэ сиргэ тутуу диэн буолбатах. Айылҕа ресурсаларын министиэристибэтин кытары бу туһунан кэпсэтэн турабыт. Бу үлэбитин салгыы ыытыахпытын наада. Мин санаабар, манна “Росводресурсы” улахан оруолу ылыахтаах”, – диэн бэлиэтиир.

Бары сонуннар
Салгыы
9 февраля
  • -48°C
  • Ощущается: -48°Влажность: 63% Скорость ветра: 0 м/с

Сообщить об опечатке

Текст, который будет отправлен нашим редакторам: