Юрий Трутнев: «Дальний Восток – Земля приключений» куонкурус туризм сайдыытын сүрүн олугунан буолуо»

РФ Бырабыыталыстыбатын бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокуругун боломуочуйалаах бэрэстэбиитэлэ Юрий Трутнев «Россия-24» ханаалга биэрбит интервьютугар Уһук Илиҥҥэ туризмы сайыннарар мэхэньииһимнэр тустарынан кэпсээтэ уонна «Дальний Восток – Земля приключений» куонкурус суолтатын бэлиэтээтэ.

«Дальний Восток – Земля приключений» куонкуруһу олус сөбүлүүбүн. Бу куонкуруһу мин толкуйдаан таһаарбытым, кырдьык, олус сөбүлүүбүн. Уһук Илин уокурук айылҕата, сирэ-дойдута олус кэрэ. Онтон кини кэрэтин көрдөрөргө манна дьону ыҥырыахха эрэ наада», — диэн бэлиэтээтэ Юрий Трутнев.

Куонкурус айан туһунан киинэлэр көмөлөрүнэн, Уһук Илин айылҕатын уонна култууратын баайын көрдөрөргө ураты кыаҕы биэрэр. Бырайыак уонунан уонна сүүһүнэн айан-сырыы уонна саҥа сирдэри арыйыы туһунан видеолары хомуйда. Бу матырыйааллары айанньыттар бэйэлэрэ уһуллулар уонна айылҕа кэрэтин дьиҥнээхтии көрдөрүү буолар.

«Өскөтүн биһиги маннык контены PR-ааҕыныстыбалар нөҥүө оҥорбуппут буоллар, улахан үп-харчы наада буолуо этэ уонна маннык түмүгү ситиһиэ суох этибит. Оттон манна дьон тугу билбиттэрин, туох кинилэри угуйарын уонна тугунан киэн тутталларын көрөбүт. Биһиэхэ сүүһүнэн маннык матырыйаал баар, ону салгыы үллэстиэхпит», — диэн Трутнев эбэн эттэ. Юрий Петрович куонукурус 2025 сылга салҕанарыгар, ону сайыннарыыга үлэ күүскэ барарын бигэргэттэ.

Күрэхтэһии сыала-соруга – Уһук Илин ураты айылҕатын уонна баай култууратын көрдөрөн, бэйэбит дойдубутуттан эрэ буолбакка, тас дойдулартан эмиэ айанньыттары тардыы буолар.