Юрий Трутнев ДНР-га байыаннай кэрэспэдьиэҥҥэ бириэмийэ туттарда

Донецкай Норуодунай Өрөспүүбүлүкэҕэ сырыытын кэмигэр РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин УИФУо-ҕа боломуочуйалаах бэрэстэбиитэлэ Юрий Трутнев “В.К.Арсеньев аатынан “Уһук Илин” Бүтүн Арассыыйатааҕы литературнай бириэмийэ үһүс анал сиэссийэтигэр “Велес” диэн позвынойдаах байыаннай кэрэспэдьиэҥҥэ саҥа эрэгийиэннэр сонуннарын сырдатыы иһин бириэмийэ туттарда.

Самара байыаһа, ааптар уонна прозаик, “VELES тихонько пишет” телеграм-ханаал ааптара “Киһи дьылҕата” номинацияҕа кыайбытын иһин 500 тыһ. солк. сэртипикээти тутта. Кини байыаннай дьайыы саҕаланыаҕыттан бойобуой дьайыыга кыттар.

“Биһиги дойдубут байыаннай эпэрээссийэни ыытар. Онон Арассыыйа тоҕо маны ыытарын, саҥа сирдэргэ-уоттарга туох буоларын туһунан кэпсиир олус суолталаах. Байыаннай дьайыы зонатыгар байыаннай кэрэспэдьиэннэр уустук  усулуобуйаҕа үлэлииллэр. Кинилэр соруктара – дьоҥҥо кырдьыгы тиэрдии”, — диэтэ Юрий Трутнев.

“Уһук Илин” литературнай бириэмийэ 2018 сылтан Юрий Трутнев көҕүлээһининэн ыытыллар. Бириэмийэ биллэр нуучча айанньытын, геограбын, этнограбын, суруйааччытын Владимир Клавдиевич Арсеньев аатын сүгэр. Алта сезон устата Бириэмийэни ылыыга Арассыыйа 25 субъегыттан 500 тахса сайаапка киирбитэ.

Былырыын олунньуга вице-премьер көҕүлээһининэн байыаннай дьайыыны кытта сибээстээх бириэмийэни олохтуур туһунан быһаарыы ылыныллыбыта. Дьүүллүүр сүбэҕэ  Арассыыйа Култууратын  министиэристибэтэ, ТАСС, А.М. Горькай аатынан Литературнай институт, Арассыыйа Суруналыыстарын сойууһа, биллэр байыаннай кэрэспэдьиэннэр киирбиттэрэ.

Анал сессия түөрт номинациялаах: ”Байыаннай дьайыыга киһи дьылҕата”, «Хайдах дьоруой буолаллар?”, “Эйигин күүтэбит!”,  “Кыайыыга хардыылар”, “Байыаннай дьайыыны куруук сырдатарын иһин”. Икки сыл устата анал сиэссийэҕэ 12 киһи кыайбыта.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата