Юрий Трутнев: «Дьокуускайга ытыы киинэ байыаннай дьайыыларга снайпердары бэлэмнииргэ тирэх буолуо»

РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ Юрий Трутнев Саха сиригэр оробуочай сырыытын чэрчитинэн Дьокуускай куоракка тутулла турар туочунай ытыы киинин тутуутун кытары билистэ.

Киини тутуу 2022 с. Юрий Трутнев сорудаҕынан саҕаламмыта диэн РФ Бэрэсидьиэнин Уһук Илин федеральнай уокуругун аппаратын пресс-киинэ иһитиннэрэр. Оччолорго вице-премьер Арассыыйа Бэрэсидьиэнин сорудаҕынан байыаннай-спортивнай бэлэмнэниигэ уонна патриотическай иитиигэ киини тэрийэргэ үлэ туһунан санаппыта.

Ол курдук, ыам ыйыгар 12 пилотнай киин аһыллыа. Өрөспүүбүлүкэ итинник кииннэри тэрийэр эрэгийиэннэргэ киирсибэт эрээри, вице-премьер санаатынан, Саха сиригэр тутулла турар үөрэтэр-эрчийэр комплекс «Арассыыйаҕа тэриллэн эрэр байыаннай-патриотическай бэлэмнээһин уопсай систиэмэтин сорох биирдэстэринэн буолуон сөп».
Үөрэтэр-эрчийэр полигон иэнэ — 407 га. Билигин көмүскүүр тутуулары тэрийэр үлэ толоруллар. Эбийиэккэ 45 киһи, 23 тиэхиньикэ үлэлиир. Мишени уонна ытар оборудованиены аҕаларга хантараак баттаһыллыбыт.

Тутуу үлэтэ барыта быйыл атырдьах ыйын саҥатыгар түмүктэнэрэ былааннанар.

«Сүрүн соругунан ытааччылары ыраахха диэри ытыыга эрчийии буолуо», – диэн эттэ Айсен Николаев.

Полигоҥҥа кылгас уостаах уонна уһун уостаах, көннөрү дьон уонна сулууспалаахтар сааларынан-саадахтарын анаһаҕас сиргэ 4 км диэри тиийэ, ону таһынан сабыылаах тииргэ ытыахтара. Үөрэтэр кииҥҥэ биирдиилээн дьону, силовой структуралар үлэһиттэрин уонна юридическай сирэйдэри саа сэбин туттууга куттал суох буолуутун тиэхиньикэтигэр, ыраахха уонну чугаска ытыы ньыматыгар үөрэтиэхтэрэ.

«Маннык киини тэрийии олус суолталаах. Биһиги снайпердарбыт байыаннай дьайыылар буолар турар сирдэригэр көдьүүстээхтик үлэлииллэр. Биһиги кинилэргэ бэлэмнэнэллэригэр, эрчиллэллэригэр көмөлөһүөхтээхпит. Саха сиригэр былыр-былыргыттан ытыыга улахан култууралаахпыт. Элбэх булчуттаахпыт. Саха снайпердара Аҕа дойду Улуу сэриитигэр дьоруойдуу кыргыспыттара. Манна туочунай ытыы киинин тэрийэн, дойду таһымнаах маастарыстыбалаах ытааччылары мунньан, Аҕа дойду Улуу сэриитигэр биир дьоруойун чиэһигэр анаммыт турниры тэрийиэхпит», – диэн Юрий Трутнев бэлиэтээн эттэ.

СӨ Ил Дарханын уонна Бырабыыталыстыбатын пресс-сулууспата.