Юрий Трутнев: “Доруобуйа харыстабыла ордук сытыы боппуруоһунан хаалар”

РФ бырабыыталыстыбатын бэрэссэдээтэлин солбуйааччы,  Уһук Илиҥҥэ бэрэсидьиэн боломуочуйалаах бэрэстэбиитэлэ Юрий Трутнев Уһук Илин социальнай-экэнэмиичэскэй сайдыытын боппуруостарыгар бырабыыталыстыба хамыыһыйатын мунньаҕын ыытта.

Уһук Илиҥҥэ доруобуйа харыстабыла табыгастаах буолуутун уонна хаачыстыбатын үрдэтии боппуруостара көрүллүбүт мунньахха СӨ Ил Дархана Айсен Николаев кытынна.

«РФ бырабыыталыстыбата  бу эйгэҕэ улахан үлэни ыытар. Уһук Илиҥҥэ биир кэлим субсидияҕа бэрэсидьиэн бырагырааматын чэрчитинэн,  2018 сылтан 80 балыыһа тутулунна уонна модернизацияланна, 50-тэн тахса биэлсэр-акушер пууна арылынна. “Доруобуйа харыстабылын сайыннарыы” судаарыстыбаннай бырагыраама чэрчитинэн,   өссө 51 эбийиэк үлэҕэ киллэрилиннэ. “Тыа сирин доктора” уонна “Тыа сирин биэлсэрэ” бырагыраамалар көмөлөрүнэн эдэр быраастар тыа сиригэр баралларыгар туһааннаах харчыны (подъемнай) ылаллар. Ол да буоллар, мэдиссиинэ идэлээх каадырдара тиийбэттэр. Ыраах сытар уонна суола-ииһэ суох нэһилиэнньэлээх пууннарга мэдиссиинэ көмөтө табыгаһа суоҕа бэлиэтэнэр”, — диэн Юрий Трутнев мунньаҕы арыйда.

РФ доруобуйаҕа харыстабылын миниистирэ Михаил Мурашко бэлиэтээбитинэн, Уһук Илиҥҥэ анал миэрэлэр ылыллаллар. 2024 сылтан Мэдиссиинэ булгуччулаах страховкатын субвенциятын ааҕарга мэдиссиинэ көмөтө табыгастаах буоларын коэффициена (1,5) киллэриллибитэ. Бу учуоттанан, 2026 сылга эбии 11,2 миллиард солкуобай бэрилиннэ.

2030 сылга диэри 11 Перинатальнай киини (оҕо төрөтөр дьиэлэри) сэбилээһин, дьахтар 7 консультациятын арыйыы, Уһук Илин 10 эрэгийиэнигэр 56 эбийиэги саҥардыы  (маастар-былааннар чэрчилэринэн) торумнаналлар.

Сыл аайы санитарнай авиацияны үбүлээһин кээмэйэ улаатыннарыллар, 2030 сылга диэри үбүлээһин кээмэйэ 31,8% үрдэтилиннэ. Ону таһынан мунньахха  мэдиссиинэ тэрилтэлэрин каадырынан хааччыйыы, телемэдиссиинэ, эминэн хааччыллыы боппуруостарын дьүүллэстилэр. Мунньах бэбиэскэтигэр  Уһук Илиҥҥэ оҕо төрөөһүнүн элбэтиигэ дьаһаллары дьүүллэһии киллэрилиннэ.

“Уһук Илин бу көрдөрүүгэ федеральнай уокуруктар ортолоругар үһүс миэстэҕэ сылдьар. Маннык түмүгү өйөбүл эбии миэрэлэрин киллэрэн: бастакы оҕо төрөөһүнүгэр биир кэлим төлөбүрү биэрии, ийэ хапытаалыгар 30% федеральнай эбии төлөбүр, Уһук Илиҥҥи чэпчэтиилээх ипотека, үс уонна онтон элбэх оҕо төрөөтөҕүнэ ипотеканы сабарга 1 мөлүйүөнү төлөөһүн көмөлөрүнэн ситистибит”, — диэтэ Юрий Трутнев.

Ил Дархан Айсен Николаев:

«Миэхэ сыыппаралар кэтэхтэригэр олохтоохтор нус-хас буолалларыгар сыһыаннаах чопчу уларыйыылар бааллара суолталаах. 2023 сылга 806 тыһыынча кв.миэтэрэ иэннээх саҥа олорор дьиэлэри киллэрдибит, оскуолалары, уһуйааннары, балыыһалары уонна успуорт эбийиэктэрин тутуу салҕанар. Дьону саахалланар кутталлаах дьиэлэртэн көһөрөбүт, оттон мэдиссиинэ көмөтө табыгастаах буолан иһэр”, — диэн Айсен Николаев бэлиэтээн эттэ.

“Кэнники сылларга  оҕо уонна ийэ харыстабылыгар олус элбэх оҥоһулунна, ол иһигэр дойдуга барытыгар 175 тэрилтэ киллэриллибит  аныгы перинатальнай кииннэр тиһиктэрэ баар буолла. Биһиэхэ билигин кырачаан оҕо өлүүтэ аҕыйах. Саҥа национальнай бырайыак чэрчитинэн, дьахтар   360-тан тахса консультация оҥоһулунна, перинатальнай кииннэр анал тэриллэринэн сэбилэннилэр”, — диэн Владимир Путин “Национальнай доруобуйа 2024” конгресс пленарнай сессиятыгар эппитэ.

СӨ Ил Дарханын уонна бырабыыталыстыбатын пресс-сулууспата