Юрий Трутнев: «Хотугу байҕал суола РФ стратегическай кыаҕын үрдэтэр»

РФ Байҕал коллегиятын Сэбиэтин Арктикаҕа Арассыыйа национальнай интэриэстэрин көмүскээһиҥҥэ мунньаҕар Хотугу байҕал суолун акваториятыгар  куттала суох буолууну хааччыйыы боппуруостара ырытылыннылар.

Тэрээһини РФ Бэрэсидьиэнин көмөлөһөөччүтэ Николай Патрушев уонна РФ Бырабыыталыстыбатын бэрэссэдээтэлин солбуйааччыта – РФ Бэрэсидьиэнин Уһук Илиҥҥэ федеральнай уокурукка боломуочуйалаах бэрэстэбиитэлэ Юрий Трутнев ыыттылар.

«Бүгүн биһиги РФ Байҕал коллегиятын Сэбиэтин Арктикаҕа Арассыыйа национальнай интэриэстэрин көмүскээһиҥҥэ уочараттаах мунньаҕын ыытабыт. Хотугу байҕал суолун акваториятыгар куттала суох буолууну хааччыйыы уонна РФ Арктикатааҕы зонатыгар саахалы-быыһыыр инфраструктураны сайыннарыы боппуруоһун көрүөхпүт. Биһиги дойдубут иһин Арктика эрэгийиэнэ мэлдьи  ураты экэнэмиичэскэй, научнай, култуурунай уонна бэлитиичэскэй суолталаах. Арктика айылҕатын баайын табыгастаахтык туһаныы, эрэгийиэн инфраструктуратын сайыннарыы, Хотугу байҕал суолун куттала суох, сыл тухары үлэлиир уонна күрэстэһэр кыахтаах национальнай тырааныспар ситимҥэ кубулутуу – бу национальнай байҕал бэлиитикэтин сүрүн соруктара буолаллар», – диэн мунньаҕы Николай Патрушев аста.

Юрий Трутнев бэлиэтээбитинэн, РФ Владимир Путин сорудаҕынан 2035 сылга диэри Хотугу байҕал суолун сайыннарар былаан оҥоһуллан олоххо киирэр. «Бу былаан толоруллуутун дьүүллэһии биһиги бүгүҥҥү мунньахпыт сүрүн сыала буолар. Хотугу байҕал суола  РФ стратегическай баһыйар кыаҕын үөскэтэр.  Азия-Чуумпу акыйаан эрэгийиэнин континент Европатааҕы чааһын кытта ситимниир эрэ буолбатах, ону таһынан биһиги дойдубут куттала суох буолуутугар суолталаах быһаарыылары хааччыйар. РФ Бырабыыталыстыбатын, бары былаас уорганнарын уонна экэниэмикэ структураларын үлэлэрэ Арассыыйа Бэрэсидьиэнинэн “Арассыыйа Арктикаҕа судаарыстыбаннай бэлиитикэтин олохторугар” уонна “Арассыыйа Федерациятын Арктикатааҕы зонатын сайыннарыы стратегиятыгар” быһаарыллыбыттара», – диэн Юрий Трутнев эттэ.

Мунньахха Хотугу байҕал суолун акваториятыгар куттала суох буолууну хааччыйыыны уонна Арассыыйа Арктикатааҕы зонатыгар саахалы-быыһыыр инфраструктураны сайыннарыыны кытта сибээстээх боппуруостар көрүлүннүлэр, саахалы-быыһыыр флоту — турар сирдэрин сайыннарыыга, навигационнай тэрили оҥорууга уонна авиационнай өйөбүлгэ эбии миэрэлэр ылылыннылар. Мунньахха Тырааныспар миниистирин солбуйааччы Александр Пошивай, Росгидромет салайааччыта Игорь Шумаков, «Росатом» Хотугу байҕал суолун дириэксиэйэтин дириэктэрэ Вячеслав Рукша, Арассыыйа ЫБМ-тын, Росморречфлот, ФМБА бэрэстэбиитэллэрэ уонна саахалы-быыһыыр үлэлэри хааччыйар тэрилтэлэр тыл эттилэр.