Юрий Трутнев Саха сиригэр Өлүөнэ муостатын тутуутун хаамыытын кытта билистэ

Дьокуускай куоракка  оробуочай сырыытын кэмигэр РФ Бырабыыталыстыбатын Бэрэссэдээтэлин солбуйааччыта – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев Ил Дархан Айсен Николаевы кытта кэлэр кэскиллээх Өлүөнэ өрүһү туоруур муоста тутуллар сиригэр сырыттылар.

«Өлүөнэ муостатын тутуутун бырайыага Дьокуускай куорат мастер-былааныгар киирэр. Уһук Илиҥҥи куораттар мастер-былааннарын РФ Бэрэсидьиэнэ Владимир Владимирович Путин бигэргэппитэ, кинилэр Уһук Илиҥҥэ дьон олоҕун тупсарыыга, табыгастаах олоҕу тэрийиигэ туһуланаллар. Мастер-былааннар – бу стратегия, биһиги ону тутуһар эбээһинэстээхпит. Ону таһынан, Өлүөнэ муостата – экэнэмиичэскэй интеграцияны хааччыйар бырайыак. Ороскуотун сабынар болдьоҕо – 15-20 сыл. Маннык улахан инфраструктурнай эбийиэккэ бу сөптөөх үлэ болдьоҕо, – диэн Юрий Трутнев эттэ.

«Өлүөнэ муостатын тутуутун болдьоҕо уонна үлэтин кыраапыга килиимэт усулуобуйабытынан учуоттанан оҥоһулунна. Аан дойдуга хаһан да маннык усулуобуйаҕа, ирбэт тоҥ уонна салгын температурата Цельсий 100 кыраадыһыгар тиийэ уларыйар сиригэр, маннык муосталар тутуллубатахтара. Оттон бу муоста уһунунан Арассыыйаҕа бастакы уон ахсаан иһигэр киириэҕэ уонна хайаатар да тутуллуоҕа», – диэн Айсен Николаев бэлиэтээтэ.

Өрүс икки кытылыгар киэҥ далааһыннаах үлэ барар, онно 300-тэн тахса исписэлиис уонна 90 тиэхиньикэ үлэлиир. Тутуу суукканы быһа барар. 2025 сыл бүтүөр диэри муоста тутааччылара Өлүөнэ муостатын 11 миэтэрэ үрдүктээх бастакы тирэҕин – хаҥас кытыл эстакадатын кытыы тирэҕин туруоруохтаахтар. Бу тирэх 18 сыбаайаҕа турар.

Дьокуускай таһыгар Өлүөнэни туоруур муоста бырайыага Арассыыйа Бэрэсидьиэнэ Владимир Путин өйөбүлүнэн олоххо киирэр уонна концессия көрүҥүнэн тутуллар. Концедент – Саха Өрөспүүбүлүкэтин Бырабыыталыстыбата. «ВИС» бөлөх концессионерынан уонна генеральнай подрядчигынан буолар. Сиһилии манна аах.