Юрий Трутнев Саха сиригэр Канкуннааҕы ГЭС тутулларын өйөөтө

Дьокуускайга УИФУо баһылыктара кыттыылаах уонна РФ бырабыыталыстыбатын бэрэссэдээтэлин солбуйааччыта уонна Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев салайааччылаах ыытыллыбыт мунньахха Уһук Илиҥҥи федеральнай уокурукка киирэр эрэгийиэннэргэ саҥа энергетическэй кыахтары үөскэтэр боппуруостар дьүүллэһилиннилэр.

«Уһук Илиҥҥэ энергетическэй кыамта тиийбэт. Инвестордар онтон кэлэн иҥнэллэр. Маннык усулуобуйаҕа экэниэмикэ сайдар кыаҕа суох. Электроэнергетика салаата билиҥҥи экономическай наадыйыылары эрэ хааччыйбакка, ону куоһарыахтаах, эрэгийиэннэр туруктаах сайдыыларыгар усулуобуйаны тэрийиэхтээх. Илиҥҥи экономическай форумҥа судаарыстыба баһылыга Уһук Илиҥҥэ энергетика сайдыытын сүрүн хайысхаларын чуолкайдык ыйан биэрбитэ, сөптөөх сорудахтары туруорбута. Олору кэмигэр сөп түбэһиннэрэн, олоххо киллэрии – биһиги сүрүн сорукпут буолар», — диэтэ Юрий Трутнев.

Мунньахха «Эльга» ГК Саха сиригэр Канкуннааҕы ГЭС тутуутун туһунан кэпсэттилэр.

«Канкуннааҕы ГЭС бырайыага олоххо киириэ диэн эрэнэбит. Туох кыаллар көмөнү оҥоруохпут. Энергетическэй кыамта тиийбэт. Ыраас генерацияны тутуу туһунан этии биһиэхэ олус суолталаах», — диэн бэлиэтээтэ Юрий Трутнев.

«РФ бэрэсидьиэнин уонна федеральнай бырабыыталыстыба өйөбүллэринэн билигин Саха сиригэр икки гигаваттан тахса уопсай кыамталаах хас да улахан электростанция тутулла турар. Бу соҕурууҥҥу уонна арҕаа Саха сиригэр саамай улахан эбийиэктэр. Канкуннааҕы ГЭС бырайыагын олоххо киллэрии туһунан быһаарыы өссө Сэбиэскэй кэм саҕана  этиллибитэ. Ол гынан баран кэккэ биричиинэлэринэн кыайан тутуллубутаҕа, ону билигин «Эльга» хампаанньа чааһынай инвестицияны туһанан, кылгас кэм иһигэр биир гигаватт кыамталаах эбийиэги тутар көҕүлээһини таһаарда. Ону таһынан, билигин 10 гигаватт кыамталаах электростанция бырайыагын олоххо киллэиини көрө сылдьаллар. Дьэ оччоҕо уот дэписиитэ Саха сиригэр эрэ буолбакка, Уһук Илиҥҥэ барытыгар суох буолуоҕа», — диэтэ Саха сирин баһылыга Айсен Николаев.

Дьүүллэһии түмүгүнэн Юрий Трутнев РФ Энэргиэтикэтин министиэристибэтигэр олох кылгас кэм иһигэр Уһук Илиҥҥэ генерация саҥа эбийиэктэрин тутар этиилэри бэлэмнииллэригэр соруйда, диэн иһитиннэрэр Ил Дархан, бырабыыталыстыба пресс-сулууспата.