Юрий Трутнев: “Уһук Илин эрэгийиэннэр сылы үчүгэй көрдөрүүлээх түмүктээтилэр”

Юрий Трутнев: “Уһук Илин эрэгийиэннэр сылы үчүгэй көрдөрүүлээх түмүктээтилэр”

24.01.2023, 08:43
Бөлөххө киир:

Вице-премьер Юрий Трутнев Уһук Илин эрэгийиэннэр былырыыҥҥы үлэлэрин түмүгүн таһаарда. Кини бэлиэтииринэн, ааспыт сылы Уһук Илин эрэгийиэннэрэ Арассыыйа үрдүнэн үчүгэй көрдөрүүлээх түмүктээтилэр.

 

Былырыыҥҥы сыл Уһук Илин эрэгийиэннэргэ үчүгэй түмүктээх буолла. Экэниэмикэ үгүс боппуруоһугар Арассыыйа орто көрдөрүүтүнээҕэр үрдүгү ситистибит. Чуолаан дьиэ-уот тутуутугар, сүрүн хапытаалга инвестицияны киллэриигэ ыытыллыбыт үлэлэр көдьүүстээхтэрин бэлиэтиэм этэ. Эрэгийиэннэргэ инвестицияны тардыы – бу биһиги биир сүрүн үлэбит. Төһөнөн эрэгийиэннэргэ бу чааһыгар болҕомто ууруллар да, оччонон саҥа эбийиэктэр тутуллаллар, үлэ миэстэтэ тахсар, — диэн бэлиэтиир Юрий Петрович.

Уһук Илин эрэгийиэннэргэ билигин 2799 инвестиционнай бырайыак үлэлиир. Барыта 500 саҥа хампаанньа тэриллибититтэн, былырыын 140 үлэҕэ киирбитэ, 14 тыһыынчаттан тахса үлэ миэстэтэ арыллыбыта. Уһук Илин эрэгийиэннэр сайдыыларын саҥа бырагыраамата үлэлиэҕиттэн федерация бүддьүөтүттэн барыта 181 млрд солкуобай ороскуоттаммыта.

Судаарыстыба Уһук Илин эрэгийиэннэргэ укпут харчыта бу кылгас кэм иһигэр барыта төннөрүлүннэ. Урутаан сайдар сирдэр уонна Владивостокка тэриллибит саҥа порт үлэлэриттэн бүддьүөккэ киирбит харчы 228 млрд солкуобайы куоһарда. Бу, мин санаабар, олус үчүгэй көрдөрүү. Манна өссө эбэн этиим, билигин инвестордар бырайыактарга угар харчылара судаарыстыбаттан кэлэр үбүлээһинтэн быдан элбэх, онон Уһук Илин эрэгийиэннэрэ бэйэлэригэр болҕомто тартылар, — диэн этэр кини.

Манна даҕатан эттэххэ, “ВЭБ.РФ” хампаанньа Уһук Илин, Арктика сайдыытын министиэристибэтин кытары киллэрбит чэпчэтиилээх кирэдьиитэ эрэгийиэннэр сайдыыларыгар улахан оруолу ылар. Былырыын бу хампаанньа көмөтүнэн барыта 126 млрд солкуобай суумалаах аҕыс бырайыак бигэргэммитэ.

Юрий Петрович эрэгийиэннэр социальнай сайдыыларыгар сыһыаран, дьон-сэргэ дохуоттаах буолуутугар, нэһилиэнньэ олоҕун тупсарыыга болҕомто ууруллубутун бэлиэтиир. Кэлиҥҥи түөрт сылга Уһук Илиҥҥи биир кэлим субсидия көмөтүнэн 1,5 тыһыынчаттан тахса социальнай эбийиэк тутулунна. Ол иһигэр былырыын Саха сиригэр Сүрэх, тымыр киинэ, Хабаровскай кыраайга Спорт уустук көрүҥнэригэр анал киин, Бурятияҕа ядернай медицина киинэ аһыллыбыттара. Уһук Илиҥҥи гектарынан барыта 111 тыһыынчаттан тахса киһи туһанна. Былырыын 11 тыһыынча киһи дуогабар оҥорсубут, барыта 15,5 тыһыынча киһи бу сирдэрин бэйэлэрин бас билиилэригэр ылбыттар. Ону сэргэ Уһук Илин эрэгийиэннэргэ киирбит чэпчэтиилээх ипотека дьон-сэргэ биһирэбилин ылла. Холобур, былырыын бу бырагырааманан туһанан 26 тыһыынча эдэр ыал дьиэлэммит.

Лента
Салгыы
29 января
  • -45°C
  • Ощущается: -45°Влажность: 64% Скорость ветра: 0 м/с

Сообщить об опечатке

Текст, который будет отправлен нашим редакторам: