Юрий Трутнев: Уһук Илин федеральнай уокурук ДНӨ көмөтүн салгыыр

РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ — РФ Бырабыыталыстыбатын бэрэссэдээтэлин солбуйааччы Юрий Трутнев ДНӨ үлэтинэн сырыытыгар чөлүгэр түһэрии үлэлэрин бэрэбиэркэлээбит.

«РФ Бэрэсидьиэнин сорудаҕынан Уһук Илин ДНӨ аҕыс сиргэ үлэ ыытыллар. Оскуолалары, балыыһалары, уһуйааннары, инфраструктураны чөлүгэр түһэрэллэр. Шефтээх территорияларга уот-күөс, сылаас бэриллиитигэр көмөлөһөбүт. Ааспыт сылга 200-тэн тахса эбийиэги чөлүгэр түһэрбиппит. Кыраапыктан хаалыы суоҕа. Быйыл үлэ эмиэ былаанынан барарын курдук ылсабыт», — диэн бэлиэтиир Юрий Трутнев.
Уһук Илин хас биирдии эрэгийиэнэ сыһыарыллыбыт сиригэр-уотугар бэйэтин эрэгийиэннээҕи бөлөҕүн сыһыарбыта, социальнай инфраструктураны чөлүгэр түһэриигэ былаанын оҥорбута. ДНӨ Бырабыыталыстыбатын кытары былааннары сөбүлэһиннэрбиттэрэ.
Сахалин уобалаһа Шахтерскайга куратордаабыта. 2022 сылга 123 эбийиэк өрөмүөннэммитэ, чөлүгэр түһэриллибитэ. Сахалин уобалаһын саахалга үлэлиир биригээдэтэ олорор дьиэлэргэ ситими салгыы өрөмүөннүүр уонна этэҥҥэ үлэлииллэрин хааччыйар, көрөр-истэр. 2023 сылга икки оскуоланы, биэс уһуйааны, ускуустуба оскуолатын чөлүгэр түһэрэр былааннаахтар. Куоракка уот-күөс барбатыгар уонна суолу оҥорууга үлэ былааннанар. Оонньуур уонна успуордунан дьарыктанар былаһааккалар оҥоһуллуохтара. Юрий Трутнев Шахтерскайга «Олимп» успуорт комплексыгар оҕолор буоксанан дьарыктаналларыгар электроннай тэрили биэрдэ.
«Успуордунан дьарыктаныы наадалаах. Күүстээх санаалаах, эрчимнээх буолуҥ, успуордунан дьарыктаныҥ», — диэбит вице-премьер.

СӨ Кировскайы чөлүгэр түһэриигэ көмөлөһөр. 2022 сылга 31 эбийиэк өрөмүөннэммит, чөлүгэр түһэриллибит. Балар ортолоругар алта эбийиэк  (оскуолалар, култуура дьиэтэ, балыыһа, олорор дьиэлэр), ОДьКХ түөрт эбийиэгэ киирэллэр. Уулуссаҕа уот-күөс чөлүгэр түһэриллибит, суол-иис өрөмүөннэммит. Дьиэлэр сылааһынан хааччыллыбыттар, носуостаах уонна ууну ыраастыыр ыстаансыйа туруоруллубуттар. Онуоха диэри куоракка сылаас ууларынан эрэйдэммиттэрэ. Олохтоохторго гуманитарнай көмө оҥоһуллар. СӨ үрдүкү салалтатын өйөбүлүнэн Кировскайтан Краснодар кыраайыгар 500-тэн тахса оҕо сынньаммыта.

Дебальцевоҕа Хабаровскай кыраай 2022 сыллаахха 26 эбийиэги чөлүгэр түһэрбитэ. Ол иһигэр «Ладушки» дьааһыла-сад, оҕо айымньытын киинэ, куорат бибилэтиэкэтэ, «Локомотив» физкултуура-успуорт комплексын сөтүөлүүр сирэ (бассейн), ОДьКХ сэттэ эбийиэгэ уонна суол хаһаайыстыбатын 15 эбийиэгэ киирэллэр.
Хабаровскай кыраай эрэгийиэннээҕи бөлөҕүн көмөтүнэн Дебальцевоҕа 21 тиэхиньикэ, 1600-тэн тахса успуорт тэрилэ, мала-сала тиэрдиллибитэ. 2023 сылга оскуоланы, уһуйааны, элбэх хайысхалаах успуорт былаһааккатын чөлүгэр түһэрэр былааннаахтар. Олохтоохторго көмө оҥоһуллар. Хабаровскай кыраай салалтатын өйөбүлүнэн 160-тан тахса оҕо Краснодарга сынньаммыт.

Юрий Трутнев Донбасска үлэтин түмүгүнэн, Уһук Илин эрэгийиэннэрэ чөлүгэр түһэрии үлэтин өссө көҕүлээн, күүһүрдэн биэрэллэригэр соруйбут.
Маны сэргэ, Юрий Трутнев уонна «Восток» бөлөх командующайа Рустам Мурадов Чуумпу акыйаан флотун пехотинецтарын кытта көрүстүлэр уонна байыаннай сулууспалаахтарга  судаарыстыбаннай наҕараадалары туттардылар. «Уһук Илин байыастара байыаннай эпэрээссийэ зонатыгар бэйэлэрин соруктарын толороллор. Кыайыыны чугаһатар туһугар бары сыраларын уураллар», — диэн бэлиэтиир Юрий Трутнев.

РФ Бэрэсидьиэнин Уһук Илин ФУО боломуочуйалаах бэрэстэбиитэлин аппараатын пресс-сулууспата