Юрий Трутнев Уһук Илин ыкса сибээстэһэр ДНР сиригэр-уотугар чөлүгэр түһэрии үлэтин көрдө

РФ Бырабыыталыстыбатын Бэрэссэдээтэлин солбуйааччы – РФ  Бэрэсидьиэнин УИФУо боломуочуйалаах бэрэстэбиитэлэ Юрий Трутнев Донецкай Норуодунай Өрөспүүбүлүкэҕэ чөлүгэр түһэриини көрдө. Кини Докучаевскай Торез, Светлодарскай куораттарыгар, Мироновскай куораттыы тииптээх бөһүөлэккэ уонна Новолуганскай бөһүөлэккэ сырытта.

“Бииргэ үлэлэһэр кэмнэригэр Уһук Илин эрэгийиэннэрэ болдьохтон хаала иликтэр. Уһук Илин эрэгийиэннэрин бары баһылыктара уонна бөлөхтөр салайааччылара Арассыыйа саҥа сирдэригэр дьон Арассыыйа өттүттэн кыһамньы баарын билэллэрин курдук үлэлииллэр. Уһук Илин уонна саҥа сирдэр-уоттар култуура өттүнэн эмиэ сибээстэһэллэр. Уһук Илин эрэгийиэннэриттэн шефтэһэр куораттарыгар быраастар, учууталлар кэлэллэр, гуманитарнай көмө оҥоһуллар”, — диэтэ Юрий Трутнев.

Саха Өрөспүүбүлүкэтэ Докучаевскай куораты уонна Еленовка  бөһүөлэги чөлүгэр түһэрэр.  Быйыл 65 эбийиэккэ чөлүгэр түһэрии ыытыллар. Сорох эбийиэктэргэ үлэлэр түмүктэннилэр. Еленовкаҕа административнай дьиэни саҥардан оҥордулар. 53 элбэх кыбартыыралаах дьиэ түннүгүн уларыталлар. Докучаевскай куорат Киин балыыһатыгар рентген-кэбиниэт хапытаалынай өрөмүөнэ түмүктэнэр. “РЕНЕКС” рентген-диагностика комплексын таҥыахтара.

Юрий Трутнев Докучаевскайга бассейннаах успуорт комплексыгар сырытта. Бүгүҥҥү туругунан эбийиэккэ үлэ бөҕө ыытыллар. Тас өттүн өрөмүөннүүллэр. Быйыл эбийиэги үлэҕэ киллэрии дьон сынньалаҥар көмөлөһүөҕэ.

“Саха сирэ Кировскайы чөлүгэр түһэриигэ үчүгэй холобуру көрдөрбүтэ. Аны билигин Докучаевскай куораты уонна Еленовканы чөлүгэр түһэриэхтээх. Быйыл 60 тахса эбийиэк былааннаммыта. Болдьоҕор бүтэриэхтэрэ диэн эрэнэбин”, — диэтэ Юрий Трутнев.

Ол иһигэр успуорт икки эбийиэгин (ДЮСШ №1 уонна ДЮСШ №2)  уонна култуура икки дьиэтин. 730 м уһуннаах уу турбатын уларыттылар. Алта дьиэҕэ кырыыһаларын хапытаалынайдык өрөмүөннүөхтэрэ. Приморье кыраайа Торез куораты чөлүгэр түһэриигэ үлэлиир. Быйыл 17 социальнай инфарструктура эбийиэктэригэр былааннаммыт үлэни толоруохтара.

Торезка Юрий Трутнев 1 №-дээх успуорт оскуолатын стадионун чөлүгэр түһэриини көрдө.

“Приморье Торез инфраструктуратын бырайыагын олохо киллэрии иһин хаста да бэлиэтэммитэ. Оскуолалар, уһуйааннар, суоллар чөлүгэр түһэллэр. Үлэ болдьоҕор ыытыллар”, — диэн бэлиэтээтэ Юрий Трутнев.

Камчатка кыраайа Светлодарскай куораты уонна Мироновскай куораттыы тииптээх бөһүөлэги оҥоруохтаах. Быйыл аҕыс социальнай эбийиэккэ үлэ бөҕө ыытыллар.

Вице-премьер 9 №-дээх Мироновскай оскуолаҕа уонна Светлодарскай үөрэтэр-иитэр комплекска сырытта. Ону тэҥэ суолу-ииһи кичэллээхтик бэрэбиэркэлээтэ.

“Кэккэ эбийиэктэри урутаан оҥорон иһэллэр. Бу олус үчүгэй көстүү. Тоҕо диэтэххэ, бу эбийиэктэр дьон олоҕо оннун буларыгар көмөлөөхтөр”, — диир Юрий Трутнев.

Чукотка автономнай уокуругун оробуочай бөлөҕө Новолуганскай бөһүөлэккэ эйэлээх олох түстэнэригэр көмөлөһөр. Быйыл 17 эбийиэги чөлүгэр түһэрии торумнанар. Хайыы-үйэ 9 трансформаторнай ыстаансыйаны туруордулар. Уу эбийиэктэригэр үлэ атырдьах ыйыгар диэри түмүктэниэҕэ.

“Чукотка чөлүгэр түһэриигэ эмиэ көхтөөхтүк кыттар. Гуманитарнай көмө тиэрдиллэр. Бойобуой дьайыы кэмигэр алдьаммыт эбийиэктэри оҥороллор. Өссө аныгылыы саҥа эбийиэктэри тутуу, куорат эйгэтин тупсарыы наадалаах. Бу биһиги сирбит, биһиги дьоммут-сэргэбит, Арассыыйа сарсын хайдах буолуохтааҕар үрдүк эппиэтинэспит”, — диэн чопчулаата вице-премьер Юрий Трутнев.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата