Юрий Трутнев уонна Айсен Николаев «Сколково» пуондатын стартап-турун аһыллыытыгар кытыннылар

Дьокуускай куоракка баар «Үлэ кыбаартала» креативнай кластерга «Сколково» пуонда ыытар пуорумугар киэҥ хабааннаах инновационнай бырайыактар көрдөрүлүннүлэр.

Пуорум кыттыылаахтарын РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуругун боломуочуйалаах бэрэстэбиитэлэ Юрий Трутнев уонна Саха өрөспүүбүлүкэтин Ил Дархана Айсен Николаев эҕэрдэлээтилэр.

Юрий Трутнев сайдыы диэн тыл хас биирдии киһи олоҕор, өрөспүүбүлүкэ олоҕор, дойдуга сүдү суолталаах, бүгүн бу көннөрү тыл буолбатах диэн эттэ.

«Саха сирэ бүгүн креативнай технологиялар сайдыыларыгар эрэллээхтик бастаан иһэр. Мин саныырбынан, Саха сирэ быйылгы сыл түмүгүнэн эрэгийиэннээҕи валовай бородуукта кэриҥинэн бастакы миэстэҕэ тахсыа дии саныыбын. Билигин «сайдыы» диэн тыл ураты суолталаах. Дьиҥ иһигэр, технологиялар сайдыыларыттан биһиги байыаннай дьайыыларга сылдьар уолаттарбыт олохторо тутулуктаах. Эһиги кинилэргэ көмөлөһүҥ, оттон биһиги эһиэхэ көмөлөһүөхпүт», – диэн эттэ Юрий Трутнев.

Оттон Ил Дархан Айсен Николаев пуорум аһыллыытыгар стартап-тур Саха сиригэр номнуо бэһис төгүлүн ыытылларын бэлиэтээтэ, «Үлэ кыбаартала» креативнай кластерга маннык бочуоттаах ыалдьыттары уонна кыттааччылары көрсөрүттэн үөрэбит диэн эттэ.

«Соторутааҕыта эрэ манна оҥорон таһаарыы эргэ дьиэтэ этэ, оттон билигин Уһук Илин бастыҥ креативнай кластера буолан турар. Сырыы аайы кытааччы элбиир, быйыл икки төгүл элбэх сайаапка киирдэ. Бүгүн — Космонавтика күнэ. Онон биһиги кыттааччыларбыт Юрий Гагарин бастакы буоларын өйдүүллэригэр көрдөһүөм этэ. Эһиги бырайыактаргыт эмиэ бастакы уонна инникигэ ааны арыйыахтарын баҕарабын!», – диэн Айсен Николаев баҕа санаатын эттэ.

Быйыл стартап-тур саҥа сүрүн тиэмэни –  «CreativeTECH. Креативные индустрии – импульс для технологического развития» киллэрдэ. Кыттааччылар 300 тыһ. солк. харчынан бириис уонна Москваҕа ыытыллар Startup Village технологическай предпринимателлэр Арассыыйатааҕы куонкурустарыгар бэйэлэрин бырайыактарын көрдөрөр быраабы ылар иһин күрэхтэһиэхтэрэ.

Тэрээһин аһыллыытыгар бэлиэтээбиттэринэн, Саха сирин креативнай сайдыыта  – эрэгийиэн сүрүн сайдыытын хайысхатынан буолар. Ааспыт сыл түмүгүнэн Арассыыйа национальнай бириэмийэтигэр наҕараадалааһыҥҥа Саха сирэ креативнай индустрия эйгэтигэр бастыҥынан буолбута. Ону таһынан өрөспүүбүлүкэ Арассыыйаҕа киинэ индустриятыгар лиидэринэн буолбута, Уһук Илин уокурукка IT-өҥөтүн экспортыгар 90 % ылбыта.

Саха сирэ дойдуга бастакынан креативнай индустрияны сайыннарыы Кэнсиэпсийэтин оҥорбута уонна бигэргэппитэ. Ааспыт сыл бүтүүтэ эрэгийиэҥҥэ «Үлэ кыбаартала» кластер аһыллыбыта – креативнай бырайыак быһыытынан тэриллибит урутаан сайдыы территориятыгар Арассыыйаҕа бастакы былаһаакка буолар.

Предпринимателлэр Юрий Трутневка уонна Айсен Николаевка бэйэлэрин технологическай оҥоһуктарын көрдөрдүлэр.

«Хоту Тент» хампаанньа нанокомпозитнай матырыйаалтан оҥоһуктарын: мобильнай хараастары, сылаас балааккалары, олбохтору, утуйар мөһөөччүктэри, анал таҥастары, о.д.а. көрдөрдө. «Дьокуускайдааҕы хочуол оһохторун оҥорор собуот» ХЭУо өр кэмҥэ умайар хочуолларын туруорда. «Якт-Сокол» хампаанньа квадроциккларын уонна снегоходтарын көрдөрдө, кинилэр уонна «Хоту Тент», «Дьокуускайдааҕы хочуол оһохторун соҥоро собуот» бэйэлэрин оҥорон таһаарбыт бородууксуйаларын көмө быһыытынан байыаннай дьайыыга ыыталларын билэбит. Итинтэн даҕаны атын, Саха сирин тыйыс усулуобуйатыгар сөптөөх технологиялаах бородууксуйалары көрдөрдүлэр.

Стартап-тур кылаабынай тэрээһиннэринэн технологическай куонкурустар буолаллар: «Информационные технологии», «Индустриальные и энергетические технологии», «Биотехнологии в медицине и сельском хозяйстве», «Технологии креативных индустрий в инновационных проектах».

Быйыл 259 сайаапка киирбит, ааспыт сылга 127 этэ.

СӨ Ил Дарханын уонна Бырабыыталыстыбатын пресс-сулууспата