Юрий Трутнев уот тарыыбын тэҥниир механизмнары көрөргө сорудахтаата

РФ бырабыыталыстыбатын бэрэссэдээтэлин солбуйааччы – Уһук Илиҥҥи уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев Уһук Илиҥҥэ уонна РФ Арктикатааҕы зонатыгар тарыыптары тэҥниир механизм  боппуруостарыгар мунньаҕы ыытта.

Вице-премьер мунньаҕы аһарыгар санаппытынан, 2017 сылтан РФ бэрэсидьиэнэ Владимир Путин быһаарыытынан, Уһук Илин сиригэр-уотугар уот энергиятыгар тарыыптары тэҥнээһин механизма үлэлиир. 2022 сылтан тарыыптары тэҥнээһин механизмыгар уларыйыылар киирбиттэрэ, туһанааччыларга, ол иһигэр Дьиэ-уот, коммунальнай хаһаайыстыба тэрилтэлэригэр, субсидияны түһүмэҕинэн кыччатыы саҕаламмыта. Ол уот тарыыба базовай көрдөрүүттэн улаатарын таһаарбат туһугар эрэгийиэн бүддьүөтүн ороскуота биллэ улаатарыгар тириэрдибитэ.
Юрий Трутнев эппитинэн, Арассыыйа бырабыыталыстыбата тэҥнээһин механизмыттан үрдүк барыстаах тэрилтэлэри ылан кэбиһэргэ, бүддьүөт эйгэтин уонна Дьиэ-уот, коммунальнай хаһаайыстыба тэрилтэлэригэр тарыыбы тэҥнииргэ субсидияны түһүмэҕинэн кыччатарга быһаарыы ылбыта. Онуоха эрэгийиэннэри өйүүргэ федеральнай бүддьүөттэн үбүнэн көмө көрүллүбүтэ.
«Биһиги билигин бу үбү толуйуу хайдах барарын бэрэбиэркэлиибит, тоҕо диэтэххэ, санаалар хайдыспыттара», — диэтэ Юрий Трутнев.
«Былырыын бу сыалга-сорукка 1,2 миллиард солкуобай суумалаах үп тиийбэтин бигэргэппиппит. Онтон 2023 сылга — 3,6 миллиард солкуобайга, 2024 сылга 4,6 миллиард солкуобайга тэҥнэстэ», – диэн Ил Дархан Айсен Николаев тоһоҕолоон бэлиэтээтэ.
Тарыыптары тэҥнээһин Камчатка кыраайыгар, Магадан уонна Сахалин уобаластарыгар, Чукотка автономнай уокуругар, Саха сирин, Бурятия өрөспүүбүлүкэлэригэр, Приморье, Хабаровскай кыраайдарга оҥоһуллар.
Юрий Трутнев Арассыыйа Үпкэ министиэристибэтигэр, Арассыыйа Федеральнай антимонопольнай сулууспатын, Арассыыйа Энергетика, Экэниэмикэ сайдыытын, Уһук Илин сайдыытын министиэристибэлэригэр, Саха Өрөспүүбүлүкэтин бырабыыталыстабытыгар «РусГидро» ПАУо-ны кытары тарыыбы тэҥнээһин механизма уларыйыытыттан бүддьүөт эбии ороскуотун анаалыстыырга, РФ бүддьүөтүн систиэмэтин суотугар толуйуу оҥоһулларын туһунан этиилээх дакылааты Арассыыйа бырабыыталыстыбатыгар киллэрэргэ сорудахтаата.