Юрий Трутнев “ВОИН” киин уон филиалын үлэтин түмүгүн таһаарда

“ВОИН” киин уон, ол иһигэр үс Уһук Илиҥҥи филиал муус устарга үлэлээбиттэрэ биир сылын бэлиэтииллэр. Сыл иһигэр 14 тыһ. тахса ыччат бэлэмнэниини ааста диэн РФ Бэрэсидьиэнин Уһук Илиҥҥэ боломуочуйалаах бэрэстэбиитэлистибэтэ иһитиннэрэр.  

“ВОИН” киин дойду Бэрэсидьиэнэ Владимир Владимирович Путин сорудаҕынан тэриллибитэ, 21 эрэгийиэҥҥэ филиал аһыллыбыта. Биһиги сорукпут – хас биирдии кииҥҥэ үгэс, уопут мэхэньиисимин тириэрдии. Бу олус улахан суолталаах. “ВОИН” киин байыаннай-патриотическай бэлэмнэнии систиэмэтин уонна ыччаты патриотическай тыыҥҥа иитиини бөҕөргөтөргө туһаайыллар. Сыл устата 14 тыһ. тахса ыччат бэлэмнэниини ааста. Курсаннар ирдэнэр байыаннай-патриотическай сатабыллары ылалларын таһынан, атын куораттартан саастыылаахтарын кытта билсэллэр, доҕордоһоллор. Бу оҕолор – Арассыыйаны күүстээх, бөҕөх оҥоруохтаах патриоттар саҥа көлүөнэлэрэ” – диэн РФ Бырабыыталыстыбатын бэрэссэдээтэлин солбуйааччы  — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев этэр.

Былырыын муус устарга аһыллыбыт “ВОИН” киин уон филиалыттан үһэ Уһук Илиҥҥэ үлэлээбитэ итиэннэ улахан түмүгү көрдөрдө. Сыл устата Саха сирин, Камчатскай кыраай уонна Сахалин уобалаһын салааларыгар 4 тыһ. тахса курсант үөрэннэ.

Саха сиригэр филиал хамаандата тирэх пууннары – үөрэх тэрилтэлэригэр “ВОИН” киин сүрүннээһининэн тэриллээх кылаастарын арыйбыта. Эрэгийиэннээҕи салааҕа сыл иһигэр 2 тыһ. кэриҥэ курсаны уонна “Куттал суох буолуутун уонна төрөөбүт дойдуну көмүскээһин” 584 педагогун бэлэмнээтилэр.

Ил Дархан уонна Бырабыыталыстыба пресс-сулууспата.