Юрист 13-с хамнас кимиэхэ тиксэрин быһаарда

hh.ru сүрүн юриһа Светлана Шабронова үлэһиттэргэ 13-с хамнас ханнык түгэҥҥэ төлөнөрүн, төлөбүр бары хампаанньаҕа булгуччулаах дуу, суох дуу, ону таһынан суумата хайдах ааҕылларын быһаарда.

hh.ru юриһа Светлана Шабронова бэлиэтииринэн, РФ Үлэтин кодексыгар  «13-с хамнас» диэн сокуонунан бигэргэтиллибит өйдөбүл суоҕун өйдүөххэ наада. Дьиҥэр, бу сыллааҕы бириэмийэ буолар. Ол эбэтэр, хамнас булгуччулаах сорҕото буолбакка, үлэһити көҕүлүүр төлөбүр. 13-с хамнас чопчу бэлиэтэммит ирдэбиллэри тутуһан, сокуонунан эбэтэр тэрилтэ иһинээҕи быраабылаларынан быһаччы көрүллүбүт үлэһиттэригэр эрэ төлөнөр.

13-с хамнас кимиэхэ тиксиэн сөбүй:

Бастатан туран, бириэмийэ кэлэктиип дуогабарыгар, бириэмийэни төлүүр туһунан балаһыанньаҕа эбэтэр үлэ дуогабарыгар төлөнөр усулуобуйалара чопчу суруллубут буоллаҕына үлэһиттэргэ тиксэр.

Судаарыстыбаннай уонна муниципальнай сулууспалаахтарга: сорох категориялаах судаарыстыбаннай сулууспалаахтарга сыллааҕы бириэмийэ нуормалыыр-быраап аахталарынан көрүллүөн сөп.

Бүддьүөт эйгэтин үлэһиттэригэр: сорох эрэгийиэннэргэ уонна муниципалитеттарга үөрэх, доруобуйа харыстабылын, култуура үлэһиттэригэр  сөбүлэһиилэринэн эбэтэр РФ субъектарын нуормалыыр аахталарынан сыллааҕы бириэмийэ олохтонуон сөп. *

Чопчу көрдөрүүлэри ситиспит үлэһиттэргэ: бириэмийэни төлүүр туһунан балаһыанньаҕа чопчу ирдэбиллэр (былааны толоруу,  үлэ хаачыстыбата) туруоруллубут буоллахтарына, бириэмийэ ити ирдэбиллэргэ эппиэттиир үлэһиттэргэ тиксэр. Сыллааҕы бириэмийэ үлэни биэрээччи бэйэтэ олохтообут быраабылатынан ааҕыллар: оклад кээмэйинэн, сыллааҕы дохуоттан бырыһыанынан, чопчу биир кээмэйдээх сууманан эбэтэр үлэ сүрүн көрдөрүүлэриттэн (KPI) / үлэ ыстааһыттан тутулуктанан.