ЮРИСТ СЭРЭТЭР: Харыйаны мээнэ быраҕымаҥ

Саҥа дьыллааҕы бырааһынньыктар кэннилэриттэн харыйаны бөх контейнерыгар бырахпыт дьон хас да тыһыынча солкуобайга диэри ыстараапка тардыллыахтарын сөп диэн РИА Новости Арассыыйа юристарын ассоциациятын чилиэнэ, «Легес Бюро» ЮК юриһа Ольга Турунина иһитиннэрдэ.

Кини этэринэн, бырааһынньыктар бүтүүлэригэр олохтоохтор бөҕү-сыыһы дьаһайыы быраабылаларын булгуччу тутуһуохтаахтар.

«Мас бөдөҥ габариттаах бөххө киирсэр, онон нуорма быһыытынан дьиэ таһынааҕы бөх контейнердарыгар быраҕар сатаммат. Бу хас да тыһыынча солкуобай кээмэйдээх ыстараапка тиэрдиэн сөп», – диэн Турунина быһаарда.

РФ Административнай кэһиилэр туһунан кодексатын 8.2 ыстатыйатынан (бөҕү дьаһайыыга тулалыыр эйгэни харыстааһын ирдэбиллэрин кэһии), харыйаны сыыһа быраҕыы иһин 3 тыһыынча солкуобай, оттон сыл иһигэр иккиһин тутуллубуттарга 5 тыһыынча солкуобайга диэри ыстараап көрүллэр.

Айылҕа харыстабылын министиэристибэтэ санатарынан, бу күннэргэ Дьокуускайга туһаттан тахсыбыт Саҥа дьыллааҕы харыйалары, бэс мастары  босхо утилизацияҕа туттарар анал пуун үлэлиир.

Мастары Кеша Алексеев уулусса, 9/1 дьиэ аадырыһынан «Якутлесресурс» Дьокуускайдааҕы филиалын баазатыгар туттарыахха сөп.  Мутукчалаах мастары хаттаан туһаҕа таһаарыы — бу аныгы уонна экологичнай ньыма. Харыйаны контейнерга быраҕар, эбэтэр, өссө куһаҕана, подъезд таһыгар хаалларар оннугар, куорат олохтоохторо ону сөпкө дьаһайар кыахтаннылар.