«Ютуб» үлэтэ Арассыыйаҕа тохтуо дуо?

Соторутааҕыта Арассыыйаҕа  «ютубу» тохтотоллор үһү диэн сурах тарҕаммыта. Бу төһө оруннааҕый?

Федерация Сэбиэтин информационнай бэлиитикэҕэ, СМИ-лэри кытта үлэҕэ хамыыһыйа бэрэссэдээтэлэ Алексей Пушков иһитиннэрбитинэн, YouTube видеохостинг үлэтин тохтотуу билиҥҥитэ былааннаммат.

Кини этэринэн, YouTube анал тэриллэрэ эргэрэн эрэллэр, тиэхиньикэ түргэнник, 2 сыл иһинэн эргэрэр, саҥардыы суох, ол онтон үлэтэ бытаарыан сөп.  Ону тэҥэ, кини «ютубка» Арассыыйа бэлиитикэтин утары үлэлиир 83 ханаалы саппыттарын туһунан иһитиннэрдэ.

Бу иннинэ «Ростелеком» YouTube үлэтэ бытаарбытын туһунан иһитиннэрбитэ. Хампаанньа саайтыгар суруллубутунан, «Гугл» хампаанньа бас билэр анал тэрилин үлэтигэр араас кыһалҕалар бааллар.

Оттон «Газета.ру» портал суруйарынан, «ютуб» үлэтин сайыҥҥы ыйдарга бытаардан, мөлтөтөн баран, күһүөрү сабар, тохтотор былаан эмиэ баар үһү.