Ювелирдар Владимир Путиҥҥа социальнай инфраструктураны сайыннарарга этии киллэрдилэр

Владимир Путин Уопсастыбаннай приемнайыгар эрэгийиэннээҕи итэҕэллээх киһитэ Алексей Егоров Саха сирин ювелирдарын кытары көрүстэ. Кини олохтоохтору кытары көрүстэ, кэпсэттэ уонна кинилэр этиилэрин салгыы хандьыдаакка тириэрдиэҕэ.

Биисинэс эйгэтиттэн Анна Еремеева этиилээх кэллэ. Кини күндү тааһы кырыылыыр уонна киэргэлэри оҥорор «Сэйбиэм» хампаанньа кластерын салайар. Кини тэрилтэтэ «Якутия» урутаан сайды сирин (ТОР) резиденинэн буолар уонна судаарыстыбаттан номнуо нолуокка уонна оҥорон таһаарар инфраструктураҕа чэпчэтиинэн туһанар.

Анна Еремеева сайдыы биир сүдү күүһүнэн манна үлэлиир дьоҥҥо социальнай инфраструктураны тутуу буолуоҕар эрэнэр. Исписэлиистэр урутаан сайдыы сирин былаһааккатыттан чугас олорор дьиэ атыылаһарга бэлэмнэр эрээри, баҕалаахтарга барыларыгар тиийбэт. Биллэн турар, дьиэни-уоту таһынан уһуйааннар уонна оскуолалар, успуорт комплекстара, поликлиникалар наадалар. Ити кластер тэрилтэтигэр саҥа квалификациялаах каадырдары биэриэ, өссө бу биисинэһэ кэҥэтиэ уонна күрэстэһэр кыаҕын үрдэтиэ этэ.

Дьокуускайга Владимир Путин уопсастыбаннай приемнайа 2023 с. ахсынньытыттан үлэтин саҕалаабыта. Волонтердар эрэгийиэн олохтоохторуттан араас хабааннаах этиилэри хомуйаллар, ол инникитин дойду бэрэсидьиэнигэр хандьыдаат Владимир Путиҥҥа тиэрдиллэр.

Санатан эттэххэ, Арассыыйа Киин быыбардыыр хамыыһыйата дойду бэрэсидьиэнин быыбарыгар түөрт хандьыдааты аһарта. Кинилэр – билиҥҥи судаарыстыба баһылыга Владимир Путин (бэйэтэ туруммут киһи), Николай Харитонов (КПРФ), Леонид Слуцкай (ЛДПР) уонна Владислав Даванков («Саҥа дьон»).