Үүнэр көлүөнэ пуондатын устуоруйатын быыстапката аһылынна

Бүгүн, атырдьах ыйын 23 күнүгэр, Дьокуускайга «Арассыыйа — мин устуоруйам» историческай пааркаҕа СӨ Үүнэр көлүөнэ тус сыаллаах пуондатын 30 сыллаах үбүлүөйүн чэрчитинэн «Созидаем будущее вместе» медиа-быыстапката аһылынна. Быыстапкаҕа өрөспүүбүлүкэ Үүнэр көлүөнэ тус сыаллаах пуонда тугунан дьарыктанарын, үлэтин-хамнаһын көрдөрөр.

Үбүлүөйдээх тэрээһиҥҥэ эбии үөрэхтээһин дьаарбаҥката уонна пуонда партнердарын көмөтүнэн түөрт хайысханан: билим, успуорт, ускуустуба уонна креатив маастар-кылаастар ыытылыннылар.

СӨ Үүнэр көлүөнэ тус сыаллаах пуондатын 30 сыллаах үбүлүөйүн бэлиэтиир тэрээһин оркестр доҕуһуолунан аһылынна. Бүгүн манна эдэр учуонайдар, программистар, спортсменнар уонна мусукааннар мустубуттар.

«Саҥа үөрэх дьылыгар биһиги партнердарбытын кытары бииргэ пуондабыт күнүн эбии үөрэхтээһин дьаарбаҥкатын тэрийиинэн астыбыт. Оҕолор уонна төрөппүттэр остуол оонньууларыгар, графическай дизайҥҥа маастар-кылаастары ыллылар. Маны тэҥэ үбүлүөйдээх сылга аналлаах, пуонда устуоруйатын уонна атаҕар туруутун туһунан медиа-быыстапка аһылынна», — диэн бэлиэтээн эттэ СӨ Үүнэр көлүөнэ тус сыаллаах пуондатын генеральнай дириэктэрэ Владимир Егоров.