Үүнэр көлүөнэ тыйаатыра драматургияҕа куонкурус түмүктэрин таһаарда

Ыам ыйын 7 күнүгэр Саха Өрөспүүбүлүкэтин Үүнэр көлүөнэ тыйаатырыгар Арассыыйаҕа Дьиэ кэргэн, Саха Өрөспүүбүлүкэтигэр Оҕо сылларыгар уонна СӨ култууратын тэрилтэлэригэр Оҕо тыйаатырын ускуустубатын сылыгар аналлаах «Тыйаатыр алыптаах эйгэтэ» («Волшебный мир театра») өрөспүүбүлүкэтээҕи куонкурус кыайыылаахтарын наҕараадалааһын сиэрэ-туома ыытылынна.

Ону сэргэ Гран-при хаһаайына Илья Семенов-Ураанай «Аммайаана» пьесатын ааҕыы буолла.
«АйАрт» бэрэссэдээтэлэ, бырайыак ааптара уонна сүрүннээччи Диана Сутакова куонкуруска көхтөөх кыттыы иһин махтанна уонна өрөспүүбүлүкэтээҕи куонкуруһу ыытыы иһин Махтал суругу РФ култууратын үтүөлээх үлэһитэ, СӨ норуодунай артыыһа, Федор Волков аатынан РФ бырабыыталыстыбатын бириэмийэтин лауреата, Үүнэр көлүөнэ тыйаатырын төрүттээччи уонна уус-уран салайааччы Алексей Павловка үөрүүлээх быһыыга-майгыга туттарда.
Дьүүллүүр сүбэ бэрэссэдээтэлэ Алексей Павлов Махтал суруктары уонна тыйаатыр туһунан өйдөбүнньүк кинигэни куонкурус спонсордарыгар уонна дьүүллүүр сүбэ чилиэннэригэр: «Айар» Национальнай кинигэ кыһатын дириэктэрэ Август Егоровка, «Айар» эрэкэлээмэ уонна PR отделын салайааччыта Анисия Неустроеваҕа, «Колокольчик+» сурунаал консультант-дириэктэрэ Динара Степановаҕа, «Чолбон» сурунаал эрэдээктэрин солбуйааччы Данил Макеевка, «Полярная звезда» сурунаал эппиэттиир сэкиритээрэ Ираида Поповаҕа, «Күрүлгэн» сурунаал кылаабынай эрэдээктэрэ Афанасий Гуриновка, Үүнэр көлүөнэ тыйаатырн литератураҕа чааһын сэбиэдиссэйэ Надежда Павловаҕа, тыйаатыр режиссера Валентина Якимецка уонна литература чааһын исписэлииһэ Диана Сутаковаҕа туттарда.

х х х

Саамай эдэр кыттааччы, 14 саастаах Злата Павлова «Сардаана» пьесатын иһин «Эдэр драматург» номинацияны ылла.

Валентина Якимец III истиэпэннээх лауреттарга дипломнары уонна бэлэхтэри туттарда:

6 саастарыгар диэри араҥаҕа -– Светлана Георгиевна Егорова-Тулуйхаанаҕа (»Дьулус толкуйдара» пьеса);
12 сааһыгар диэри — Мария Ивановна Винокурова-Мааны Маарыйаҕа («Иэйии иччилэрэ»);
18 сааһыгар диэри — Анна Григорьевна Пшенниковаҕа («Как Ванька – писарь Уду спасал»).

Анисия Неустроева II истиэпэннээх лауреттарга дипломнары уонна бэлэхтэри туттарда:

6 саастарыгар диэри араҥаҕа Айсена Иннокентьевна Павловаҕа («Кутуйах уонна ый кыыһа»);
18 сааһыгар диэри — Валериан Парфеньевич Николаевка «Өлүүнү кыайбыт – өлбөт».

Онтон «Айар» Национальнай кинигэ кыһата 2000 суумалаах сэртипикээти 6 сааһыгар диэри араҥаҕа I истиэпэннээх лауреат Людмила Максимовна Носковаҕа («Зайка трусишка, Лягушка и мышка») туттарда.

Арассыыйа Суруйааччыларын уонна Суруналыыстарын сойуустарын чилиэнэ Ираида Попова «Полярная звезда» сурунаалга бэчээттэнэри туоһулуур сэртипикээти 12 сааһыгар диэри араҥаҕа II истиэпэннээх лауреат Анастасия Васильевна Дарбасоваҕа (Даниловаҕа) («Послание розовой чайки») туттарда.
12-гэр диэри саастаах араҥаҕа I истиэпэннээх лауреат Александра Дмитриевна Эверстова («Хоодуот чооруос») «Чолбон» сурунаалга бэчээттэнэрин туоһулуур сэртипикээтинэн наҕараадаланна.
СӨ Суруйааччыларын, Арассыыйа Суруналыыстарын сойуустарын чилиэнэ Афанасий Гуринов-Арчылан «Күрүлгэн» сурунаалга тахсар туһунан сэртипикээти I истиэпэннээх лауреат Иван Афанасьевич Андросовка-Айанньыкка («Уһуйуллуу») туттарда. Айанньыт ону сэргэ «Айардартан» бэлэхтэри тутта.
Гран-при хаһаайына Илья Семенов-Ураанай «Тыйаатыр алыптаах эйгэтэ» өрөспүүбүлүкэтээҕи куонкуруһу тэрийээччи Алексей Павловтан кыайыылаах дипломун уонна бэлэҕи тутта.

Наҕараадалааһын үөрүүлээх сиэрин-туомун кэнниттэн кыайыылаах Ураанай «Аммайаана» пьесатын (режиссер Валентина Якимец) тыйаатыр артыыстарын ааҕыылара тэрилиннэ.
«Аммайаана» -– Амма өрүс уонна Харама хайатын айыллыытын туһунан кэпсиир дыраама.
«Тыйаатыр алыптаах эйгэтэ» драматургия куонкуруһа оҕолорго уонна ыччаттарга дыраама саҥа айымньыларын булар соруктаах.

(Үүнэр көлүөнэ тыйаатырын пресс-сулууспата)