Үүнэр көлүөнэ тыйаатыра Коми тыйаатырын испэктээктэригэр ыҥырар

Алтынньы 5 күнүттэн Дьокуускай куоракка  РФ Култуураҕа министиэристибэтин былаанынан тэриллибит  Коми Өрөспүүбүлүкэтин Ыччатын тыйаатырын “Улахан гостуруола” саҕаланна.

Коми Өрөспүүбүлүкэтигэр В.Савин аатынан дыраама академическай тыйаатырын баазатыгар үлэлиир Ыччат тыйаатыра – дойдуга биир саамай эдэр тыйаатыр. Тыйаатыр 2019 сыллаахха, Арассыыйаҕа Тыйаатыр сылыгар тэриллибитэ.

Бүгүн Үүнэр көлүөнэ судаарыстыбаннай тыйаатырыгар буолбут пресс-кэмпириэнсийэҕэ Коми Өрөспүүбүлүкэтин Ыччатын тыйаатырын дириэктэрэ, Коми Өрөспүүбүлүкэтин култууратын  үтүөлээх үлэһитэ  Михаил Николаевич Матвеев, тыйаатыр  артыыстара кытыннылар. Кинилэри бэҕэһээ Дьокуускай куорат аэропордугар сахалыы алгыһынан, чороонноох кымыһынан көрсүбүттэриттэн олус долгуйбуттарын биллэрэн улахан махталларын эттилэр.

Коми тыйаатыра бүгүҥҥүттэн алтынньы  9 күнүгэр диэри Үүнэр көлүөнэ тыйаатырын сыанатыгар  “СКТВКР” (“Сыктыквар”) уонна “Игра в фанты”  испэктээктэрин көрдөрүөҕэ.

Кэмпириэнсийэҕэ СӨ Үүнэр көлүөнэ судаарыстыбаннай тыйаатырын дириэктэрэ Владимир Николаевич Охлопков Коми тыйаатыра ыалдьыттыы кэлиитэ умнуллубат улахан түгэнинэн буоларын бэлиэтээтэ. Кини Үүнэр көлүөнэ тыйаатыра быйыл сайын Сыктывкарга сылдьан, “Дьол тааһа” уонна “Беранже хоруол”  диэн икки испэктээги көрдөрбүтүн,  кинилэри тыйаатыр кэлэктиибэ үрдүк таһымнаахтык көрсүбүтүн, испэктээктэр ситиһиилэммиттэрин, онтон билигин атастаһыы быһыытынан комилар биһиэхэ ыалдьыттыы кэлбиттэрин санатта.

“Аҥаардас биһигини хайдах көрсүбүттэриттэн өрөспүүбүлүкэ дьоно бары эйэҕэстэригэр-сайаҕастарыгар, чараас дууһалаахтарыгар уонна үтүө санаалаахтарыгар эрэнэбит. Чуолаан, сахалыы саҥаны истиэхпитин наһаа баҕарабыт.

Биһиги тыйаатырбыт, эһиэхэ холоотоххо,  олус эдэр. Академическай тыйаатырбыт иһинэн тэриллибиппит үс эрэ сыл буолла. Ол да буоллар,  репертуарбыт киэҥ. Сорох тыйаатырдар кэлэктииптэригэр эдэрдэрэ эбэтэр кырдьаҕастара баһыйаллара, тэҥэ суох ахсааннаахтара   репертуары оҥорорго  дьайар. Онтон  биһиги тыйаатырбыт кэлэктиибигэр оннук суох. Онон Ыччат тыйаатырын ханнык баҕарар испэктээгэр тэҥҥэ оонньуур кыахтаахпыт”, —  диэн артыыстар санааларын үллэһиннилэр.

“СКТВКР”

Туруорааччы-режиссер  Максим Соколов “СКТВКР”  документальнай бырайыага Коми Өрөспүүбүлүкэтэ хайдах олорорун, кинилэри туох долгутарын көрдөрөр. Бу испэктээк былырыын алтынньыга сүрэхтэммитэ, көрөөччүлэр олус истиҥник ылыммыттара. Саха сирин көрөөччүлэрэ эмиэ  артыыстар оонньууларын сэргэ, креативнай сценографияны, уунан туолбут бассейҥҥа оонньооһуну сонургуу көрүөхтэрэ. Бассейн үрдүгэр улахан экраҥҥа документальнай матырыйааллар көрдөрүллэн, испэктээк ис хоһоонун ситэрэн-хоторон биэриэхтэрэ.  Испэктээккэ биллиилээх блогер Софья Шаманская, хайыһардьыт Андрей Нутрихин, Ижмаҕа бөртөлүөт түһэр былаһааккатын хамандыыра Сергей Сотников сэһэргииллэрэ уонна артыыстар, кинилэр доҕотторо кэпсээбит устуоруйалара көрдөрүллэллэр.

Испэктээк 2021 сыллаахха “Кыһыл көмүс мааска” тыйаатыр бэстибээлин  “Маска Плюс” куонкуруһу таһынан бырагырааматын  кыттыылааҕынан буолбута элбэҕи этэр. Артыыстар ол долгутуулаах түгэннэри ахтан-санаан аастылар.

Бу туруорууну Үүнэр көлүөнэ тыйаатырыгар алтынньы 5-6 күннэригэр 17.00 чаастан көрүөххэ сөп.

“Игра в фанты”

Бу Арассыыйа  биллиилээх драматура Николай Коляда  бастакы пьесаларыттан биирдэстэрэ. Драматург   1980-с сыллар ортолоругар суруйбут пьесатыгар сыанаҕа  чэпчэки майгылаах,  наркоманнар, фарцовщиктар сүрүн оруолларга киирбиттэрин  ааҕааччылар уонна  көрөөччүлэр толоос быһыынан ылыммыт кэмнээхтэрэ. Ол гынан баран, ол кэмнэр атрибуттара  пьесаны “былыргы” оҥорботохторо. Онон, “Игра в фанаты” айымньынан сүүсчэ испэктээк туруоруллубута уонна 35 сыл буолан баран  син биир суолталаах уонна  көрөөччүлээх.

Коми Өрөспүүбүлүкэтин бырабыыталыстыбатын бириэмийэтин  лауреата, режиссер Денис Рассыхаев туруорбут  испэктээгэ алтынньы 7 күнүгэр 18.00 чаастан, алтынньы 8 күнүгэр 14.00  уонна алтынньы 9 күнүгэр 15.00 чаастан буолуоҕа.

Быһаарыы:

Гостуруол-кэнсиэр РФ Култуураҕа министиэристибэтин Арассыыйатааҕы былаанын биир сүрүн соругунан норуот айар талаанын уонна тыйаатырын ускуустубатын харыстааһын уонна киэҥник тарҕатыы буолар. Арассыыйаҕа барытыгар олоххо киллэриллэр  былааҥҥа икки киэҥ хабааннаах  федеральнай бырагыраама:  “Улахан гостуруоллар” (тыйаатырдар гостуруоллара) уонна “Биһиги – Арассыыйа” (национальнай кэлэктииптэр гостуруоллара)  киирэр.  Бу икки бырагыраама көмөтүнэн  көрөөччүлэр Арассыыйа тыйаатырдарын бастыҥ туруорууларын, дойду кэлэктиитпэрин кэнсиэртиир бырагыраамаларын билсэр, саҥа эдэр көрөөччүлэр култуураҕа таһымнара  үрдүүр кыахтанар.