Үүнэр көлүөнэ тыйаатыра Красноярскайга бэстибээлгэ кытынна

“Полюс. Золотой сезон” эрэгийиэннээҕи тыйаатырдар кэлэктииптэрин 9-с куонкуруһун кыайыылааҕа – СӨ Үүнэр көлүөнэ судаарыстыбаннай тыйаатыра Красноярскайга “Территория. Красноярск” аныгы ускуустуба бэстибээлигэр кытынна.

Үүнэр көлүөнэ тыйаатыра   алта кыайыылаах испэктээк ортотугар киирсэн, бэс ыйын 5 күнүгэр А.А.Пушкин аатынан Красноярскайдааҕы дыраама тыйаатырыгар Максим Горькай пьесатынан, Сергей Потапов туруоруутугар “Түгэххэ” пьесаны көрдөрдө.

Манна даҕатан эттэххэ, Үүнэр көлүөнэ судаарыстыбаннай тыйаатыра бу куонкуруска  үс диплом хаһаайына (2018, 2021, 2022 сылларга). Бу да сырыыга тыйаатыр үлэтин көрөөччүлэр, эспиэрдэр сөбүлээбиттэрин биллэрдилэр.

Биһиги артыыстарбыт бэстибээл кэмигэр күн аайы араас сэминээргэ, маастар-кылааска, көрсүһүүгэ кытыннылар.

Бэстибээл сарсын, бэс ыйын 11 күнүгэр түмүктэнэр.