Туһалаах сүбэлэр

Оҕуруотчуттар быйыл тугу үүннэрэллэрин туһунан кэпсэтэллэрэ, суруйсаллара, ыйыталаһаллара элбээтэ.

Бу кэмҥэ туһалаах буолуо диэн, Е.Гаврильева-Сибэкки Дуунньа сүбэтин таһаарабыт.

Сиэмэни араас ыарыылартан, бактыарыйалартан эмтиибин, ол эбэтэр 12 чаас устата, ханнык стимулятор («вертера-гумин», «корневин», «эмбиота», «эпин», «циркон») баарынан, инструкцияларын тутуһан сытыарабын. Үүнүүнү күүһүрдэр эттигинэн байытабын.

Сорох уопуттаах сибэккини үүннэрээччилэр итиини-тымныыны тулуйа үөрэтэргэ  стратификация ньыматын оҥороллор. Ол аата сиэмэни сиигирдэн, бөскөтөн баран, тымныыга туруора түһэллэр. Быһата, кыһыҥҥы усулуобуйаны тэрийэллэр. Дьэдьэн сиэмэтин таһырдьа 4-5 да хонноруохха сөп. Дьиэҕэ киллэрэн сылаас сиргэ (ититэр ситим батарыайатыгар буолбатах) сытыараллар, оччоҕуна тахсыылара икки төгүл үрдүүр. Дельфиниум стратификацията суох тыллыбат эбэтэр олус бытааннык үүнэр. Ирбиттэрин кэнниттэн сылаас ууга 5 мүнүүтэ угаллар. Өрө дагдайан тахсыбыт, аһа суох сиэмэлэри быраҕаллар. Аллараа тимирбит чэгиэн сиэмэлэри ылан буорга баттыыллар.

Е.Гаврильева — Сибэкки Дуунньа,

«Үрдүк үүнүү кистэлэҥэ» («Айар» кинигэ кыһата, 2023 с.) кинигэтиттэн.