Үүтү бэлэмнээһин былаанын 60-тан тахса бырыһыана толорулунна

Саха сиригэр барыта 40,2 тыһыынча туонна үүт, сыллааҕы былаан 64%  бэлэмнэннэ. Ол туһунан СӨ Тыа хаһаайыстыбатыгар уонна ас-үөл бэлиитикэтигэр министиэристибэтин ас бырамыысыланнаһыгар уонна бородууктаҕа куттал суох буолуутугар отдел салайааччыта Егор Чичигинаров иһитиннэрдэ.

Быйылгы сылга  уопсайа 62,7 тыһыынча туонна үүтү бэлэмнээһин торумнанар. Бу нэдиэлэҕэ үүтү бэлэмнээһиҥҥэ үрдүк көрдөрүүлээхтэринэн  Мэҥэ Хаҥалас (129,3%), Чурапчы
(122,4%), Кэбээйи (113,6%), Томпо (110,8%), Горнай (109%), «Дьокуускай куорат» КУо (106%), Сунтаар (105,7%), Хаҥалас (105,4%) улуустара буоллулар.

«Бу сыалга-сорукка 4 миллиард 309 мөлүйүөн солкуобай кээмэйдээх субвенция көрүлүннэ, онтон 20 муниципальнай тэриллиигэ 2 млрд 300 мөлүйүөн  бэрилиннэ”, — диэтэ Егор Чичигинаров.

Отдел салайааччыта быһаарбытынан, быйылгыттан ыла өрөспүүбүлүкэ бырабыыталыстыбатын уурааҕынан, үүтү учуоттааһын уонна тутуу «Сервис учёта принимаемого молока в РС(Я)» сыыппаралаах платформа, тутар пууннар нөҥүө оҥоһуллар.  47  соҕотуопкалыыр тэрилтэ бу сыыппаралаах платформаны туһанар.

Оттон отчуоттуур кэм устатыгар 205 733 гектардаах  оттуур ходуһа охсулунна уонна 211 948 туонна от, ол эбэтэр былаантан  49% бэлэмнэннэ, Өрөспүүбүлүкэҕэ  оттооһун хаһаайыстыбаларыгар  9 234 звено (ол иһигэр, 3 353 механизациялаах, 3 358 механизация аҥаардаах, 62 ат-илии уонна 2 373 илиинэн) баар. Барыта  24 019 киһи, 9 806 тыраахтар уонна араас тиэхиньикэ үлэлиир.

«Кэккэ улуустарга өрүстэргэ уу элбээбитинэн, 5 улууска: Аммаҕа, Горнайга, Томпоҕо, Уус Алдаҥҥа уонна Хаҥаласка 87 мобильнай звено тэрилиннэ. Сиилэһи уонна сенаһы бэлэмнииргэ кыра хаалыы баар, Уопсайынан, оту бэлэмнээһин былааныгар көрдөрүүлэр куһаҕана суохтар. Сорох улуустар графигы аһаран иһэллэр”, — диэтэ Егор Чичигинаров.

Барыллаан чахчынан, бу сылга килиимэт усулуобуйатын учуоттаан, улуустар 394 тыһыынча туонна оту бэлэмнииллэрэ сабаҕаланар.

СӨ Ил Дарханын уонна бырабыыталыстыбатын пресс-сулууспата