Үүтү соҕотуопкалааһын сыллааҕы былаана туолла

Өрөспүүбүлүкэҕэ 62,9 тыһыынчаттан тахса туонна үүтү соҕотуопкалаатылар — ити сыллааҕы былаан 100%-гар тэҥнэһэр. Былырыыҥҥы  кээмэйэ 59,1 тыһыынчаттан тахса туонна этэ.

Ахсынньы 15 күнүгэр үүтү астыыр-үөллүүр тэрилтэлэр үлэһиттэрин мунньаҕар 2025 сыллааҕы үлэ барыллааһын түмүгүн таһаардылар. 2025 сылга  үүтү соҕотуопкалыырга өрөспүүбүлүкэ судаарыстыбаннай бүддьүөтүттэн 4 309 мөл. солкуобай кээмэйдээх субвенция көрүллүбүтэ. 3 674 мөл. солкуобай кээмэйдээх субсидия 20 муниципальнай тэриллиигэ барытыгар ыытылллыбыт —  сыллааҕы үбүлээһин 85,3%-гар тэҥнэһэр.

«Үбүлээһини муниципалитеттарга тиэрдиигэ баар уустуктары аахсыбакка, тыа хаһаайыстыбатыгар ааһан эрэр сыл түмүктэрэ ситиһиилээх буолла. Үүтү соҕотуопкалыыр кээмэйинэн, ааспыт сыллааҕы көрдөрүүлэри куоһардыбыт. Ону таһынан атын бородууксуйаны оҥорууга эмиэ үчүгэй ситиһиилэннибит. Бу салааны өйүүр саҥа мэхэньииһимнэри киллэрии уонна боломуочуйаны муниципалитеттарга биэрии көдьүүстээҕин көрдөрөр. Бу хайысханан үлэни салгыы тупсарыы олохтоох бородууксуйаны оҥорууну элбэтэргэ туруоруллубут сыаллары бигэтик ситиһэргэ кыах биэриэҕэ», — диэн Бырабыыталыстыба Бэрэссэдээтэлин солбуйааччы Сергей Местников тэрээһин кыттыылаахтарыгар эттэ. Бэрэссэдээтэли солбуйааччы кэлэр сылга үүтү соҕотуопкалыыр кээмэйи муниципалитеттар хаһаайыстыбаларын дьиҥнээх кыаҕыттан көрөн быһарга наадатын  бэлиэтээтэ.

Бу нэдиэлэҕэ үүтү соҕотуопкалыырга сыллааҕы былааны толорууга бастыҥ көрдөрүүлээх улуустарынан буоллулар: Сунтаар улууһа – 104,3%, Үөһээ Дьааҥы– 102,7%, Чурапчы – 101,2%, Горнай – 100,9%, Кэбээйи – 100,9%, Хаҥалас – 100,6%.

Сыл түмүгүнэн арыыны оҥоруу 1,7 тыһ. туоннаҕа тэҥнэһиэ диэн сабаҕаланар (ааспыт сылтан 4% үрдүк),  үүт – 3,1 тыһ. туонна (15% үрдээбит), аһыы үүт астар – 4,6 тыһ. туонна, оттон сыыр уонна иэдьэгэй – 766 туонна (10% элбээбит).