ZA_ZA саха бренда Индияҕа Арассыыйа чиэһин көмүскүөҕэ

Индияҕа Мумбаи куоракка «Lakme Fashion Week» фэшн-индустриятын биир тутаах түгэнинэн Саха сириттэн ZA_ZA бренды төрүттээбит дизайнер Александра Корякина кыттыаҕа.

Ол туһунан Култуура министиэристибэтигэр иһитиннэрдилэр. Саха дизайнера Арассыыйа брендтэриттэн талыллан пуорумҥа ыҥырыллыбыта историческай суолталааҕын бэлиэтээтилэр. Манна даҕатан эттэххэ, саха кыыһын бренда Арассыыйа үрдүнэн соҕотох.

Корякина этэринэн, саҥа кэллиэксийэ Болливуд үйэтигэр көлүөнэни түмэр, сомоҕолуур. «ZA_ZA саҥа кэллиэксийэтэ Болливуд дьоруойдарынан сөҕөр-махтайар урукку кэмнэри санатар. Сибэкки ойуулардаах кэллиэксийэ чаҕылхай кырааскаларынан ураты», — диэн дизайнер санаатын үллэстэр.

Санатан эттэххэ, Александра Корякина Дьокуускайдааҕы технология уонна дизайн кэллиэһин выпускнига. Кини айар суолун өссө үөрэнэ сылдьан үс толору кэллиэксийэни оҥорбута. 2023 сыллаахха «СӨ култууратын туйгуна» бэлиэнэн наҕараадаламмыта.