Забайкальеҕа ойуур баһаарын умуруорууга көмөлөһөллөр

«Авиалесоохрана» парашютист-десантниктара Забайкалье кыраайыгар ойуур баһаарын умулларыыга көмөлөһөллөр.

Уоту утары охсуһууга Саха сириттэн 150 киһи барбыта.

Ыаллыы эрэгийиэҥҥэ ойуур баһаарынан ыксаллаах быһыы-майгы эрэсиимэ биллэриллибитэ. Уот хаппыт уопсай иэнэ 150  тыһ.гектар.

—Биһиги байыастарбыт түөрт ойуур баһаарын умуруорбуттар. Иһитиннэрэллэринэн уоту утары охсуһааччылары саҥа баһаар турбут сиригэр түргэнник илдьэн иһэллэр. Билигин сүрүн күүстэр улахан баһаардары умуруорууга үлэлэһэллэр. Биһиги учаастакпытыгар былыттаах, онон сотору сөҥүү түһэригэр эрэнэбит, — диэн этэр ПДПС бөлөҕүн ыстаарсайа Порфирий Габышев.

СӨ экологияҕа, айылҕаны туһаныыга уонна ойуур хаһаайыстыбатын министиэристибэтигэр бэлиэтээбиттэринэн, күн-дьыл туругуттан тутулуктаммакка уоту умуруораллар.

—Ойуур баһаарын умуруорааччылар күүс-уох, өй-санаа өртүнэн бэлэмнээхтэрин таһынан, кинилэр экстремальнай усулуобуйаны, сылааһы, буруону тулуйаллар, — диэн бэлиэтииллэр.

Министиэристибэҕэ этиллибитин курдук, эрэгийиэннэр икки ардыларыгар хардарыта көмөлөсүһүү, бииргэ үлэлээһин ойуур баһаардарын утары охсуһарга улахан суолталаах.

Хаартыскалар: sakha.gov.ru ылылыннылар