Забайкальскай кыраайга сүөһү кутталлаах ыарыыта бэлиэтэммит

Бу күннэргэ мессенджеринэн, социальнай ситимнэринэн: “Забайкальеҕа пастереллёз өрө туран, Бурятияҕа ураты бэлэмнээх буолуу эрэсиимин биллэрдилэр” – диэн ис хоһоонноох сурук тилийэ көттө.

Тустаах боппуруос Саха сирин олохтоохторун долгутара оруннаах – Бурятия этэ кэлин атыыга хамаҕатык барар. Онон чахчытын билээри, Бурятия Өрөспүүбүлүкэтин, Забайкальскай кыраай саайтарын киирэн көрүтэлээтим.

“Бурятия бырабыыталыстыбатын иһинэн сүөһү сыстыганнаах ыарыыта тарҕаныытын бохсор хамыыһыйа, Забайкальскай кыраайы кытта кыраныыссалаһа сытар алта оройуоҥҥа, бу күннэргэ үрдүк бэлэмнээх буолуу эрэсиимин киллэрэр туһунан быһаарыыны ылынна.  Ыаллыы олорор дьоммут сүөһү иитиитинэн дьарыктанар хаһаайыстыбаларыгар пастереллёз кутталлаах ыарыытын булбуттар. Бу киһиэхэ бэриллиэн сөптөөх ыарахан бактериальнай инфекция. Ыарыы кыыл киһини ытырдаҕына, хайа тартаҕына, ону тэҥэ, салгынынан уонна сараасалаах бородууксуйаны сиэтэххэ, ууну истэххэ бэриллэр. Тирии, сүһүөх оннооҕор тыҥа ыарыыта буулуон сөп.

Пастереллёз ыарыыта өрө турбутунан, Россельхознадзор Забайкальеттан сүөһүнү, сибиинньэни, ону тэҥэ, сүөһү этиттэн бородууксуйалары киллэрэри бопто. Үрдүк бэлэмнээх буолуу эрэсиимин Бурятия Бичурскай, Еравнинскай, Заиграевскай, Кижингинскай, Кяхтинскай уонна Мухоршибирскай оройуоннарыгар биллэрдилэр. Бурятия уонна Забайкальскай кыраай икки ардынааҕы суолга бэтэринээрдэр хонтуруоллуур постарын туруордулар” – диэн Байкал 24 сайт суруйар.

Онтон Забайкальскай кыраайга балаһыанньа хайдаҕый? Чита.ру суруйарынан, Новоборзинскай сэлиэнньэтигэр, Даурия бөһүөлэгэр пастереллёз ыарыыта өрө турбутунан сибээстээн, Борзи куоракка сэтинньи 1 күнүттэн тыа хаһаайыстыбатын дьаарбаҥкаларын боппуттар, алтынньы 27 күнүттэн ураты бэлэмнээх буолуу эрэсиимин биллэрбиттэр. Манна даҕатан эттэххэ, сорох саайтары көрдөххө, өссө былырыын Забайскальскай кыраайга ынахтар пастереллеһунан ыалдьыбыттара бэлиэтэнэ сылдьыбыт эбит.

Бурятияҕа ураты бэлэмнээх буолуу эрэсиимэ биллэриллибитин туһунан иһитиннэрии Саха сиригэр тоҕо киэҥник тарҕаммыта биллэр – Дьокуускайга Бурятия этин кэлин хамаҕатык атыылыыллар. Итини бу күннэргэ Дьокуускайга Бурятия этин кууһунан атыылыыр маҕаһыыннарга халыҥ уочарат буолбут дииллэрэ туоһулуур. “Олохтоох эт көмүскэ тэҥнээх, бас быстар сыаналаах. Алтай, Новосибирскай этинээҕэр Бурятия этэ ордук, Саха сирин сүөһүтүн этигэр майгынныыр, сыаната даҕаны арыый удамыр” – диэн дьон этэр.