«ЗаБег.РФ» полумарафоҥҥа 1000-тан тахса киһи кытынна

Дьокуускайга ыам ыйын 19 күнүгэр ыытыллыбыт VIII Бүтүн Арассыыйатааҕы «ЗаБег.РФ»  полумарафоҥҥа 1000- тан тахса киһи кытынна.

Тэрээһин күнүс 15.00 чаастан Орджоникидзе аатынан болуоссаттан саҕаламмыта. Кыттааччылар үс категориянан кытыннылар: «саҥа саҕалааччы», «любитель» уонна «профи». Итиэннэ оҕолорго туһунан «юниор» туспа категорияҕа араардылар.

Дьокуускайга кыттааччылар баҕаларынан 1 км (оҕолор), 5 км (1 эргимтэ), 10 км (2 эргимтэ) уонна 21,1 км (4 эргимтэ) ыраахха сүүрдүлэр. Сүүрүү маршрутунан уулуссаларга сырыы быстах кэмҥэ тохтотуллубута. Хас биирдии кыттааччыга футболка, нүөмэр, брендированнай мөһөөччүк, сэртипикээт уонна өйдөбүнньүк мэтээл туттардылар.

Санатан эттэххэ, дойду Бэрэсидьиэнэ Владимир Путин 2030 сылга дойду 70% успуордунан тиһигин быспакка дьарыктанарга сорук туруорбута.

Саха сиригэр «Успуорт — олох нуормата» федеральнай бырайыак көмөтүнэн физкултууранан уонна успуордунан утумнаахтык дьарыктанар дьон ахсаана  элбиирэ ситиһиллибитэ. Саха сиригэр успуордунан дьарыктанар киһи ахсаана өрөпспүүбүлүкэ нэһилиэнньэтин уопсай ахсааныттан улахан аҥаарыгар тиийдэ.