Захаровтар педагогическай династияларын төрүттээччи И.Е. Захаров 95 сылыгар

Кулун тутар 5 күнүгэр Чурапчы улууһун Дириҥ орто агрооскуолатыгар СӨ  үтүөлээх тириэньэрэ, ХХ үйэ чулуу үлэһитэ, “Өрөспүүбүлүкэҕэ спорт уонна физкультура сайдыытын иһин”, “Гражданскай килбиэн” бэлиэлэр хаһаайыннара, Учууталлар учууталлара, спорт бэтэрээнэ, “Хоптоҕо нэһилиэгин Ытык олохтооҕо” анал аат хаһаайына,  Захаровтар педагогическай династияларын төрүттээччи  Иван Егорович Захаров  95 сылыгар аналлаах сэминээр-практикум буолан ааста.

Иван Егорович  1956-1992 сылларга  Дириҥ орто оскуолатыгар физкультура учууталынан, тириэньэринэн бэйэтэ туспа ураты суоллаах-иистээх  үлэлээн, өрөспүүбүлүкэҕэ, улууска инники күөҥҥэ сылдьар физкультура учуутала буола үүммүтэ. Киниэхэ саамай таһаарыылаахтык үлэлии сылдьар кэмигэр СӨ үтүөлээх тириэньэрэ ааты иҥэрбиттэрэ да элбэҕи этэр. Үөрэппит, уһуйбут-такайбыт  оҕолоруттан 40-тан тахса оҕо учуутал идэтин баһылаан, өрөспүүбүлкэ араас муннугар үлэлээбиттэрэ. Үтүөлээх тириэньэр аатын Саха сиригэр, Арассыыйаҕа үрдүк ситиһиилээх үөрэнээччилэрэ элбэхтик ааттаппыттара.

Захаровтар педдинастиялара уопсайа 179 сыл педстажтаах. Династияҕа Иван Егорович төрөппүт 3 оҕото, күтүөттэрэ, сиэннэрэ киирэллэр.

Семинар-практикум ыалдьыттарынан  СӨ Үөрэххэ уонна билимҥэ министиэристибэтин кадры бэлэмнээһин, судаарыстыбаннай сулууспа уонна юридическай хааччыйыы салаатын салайааччыта  Винокурова Мария Михайловна,   С.Ф. Гоголев аатынан Дьокуускайдааҕы педагогическай колледж дириэктэрэ Николаева Изольда Ивановна, Чурапчы улууһун үөрэҕин управлениетын начаалынньыгын бастакы солбуйааччы Моисеева Алена Борисовна,  РФ спордун маастара, СӨ үтүөлээх тириэньэрэ, И.Е.Захаров үөрэнээччитэ  Нохтунскай Гаврил Федорович буоллулар. Сэминээргэ Чурапчы улууһун оскуолаларын дириэктэрдэрэ, учууталлара уонна педагогическай кылаас үөрэнээччилэрэ кыттыыны ыллылар.

Бастакы чааһыгар династия чилиэннэрэ аһаҕас дьарыктары ыыттылар. Ол курдук алын кылаас учуутала Платонова Александра Ивановна уонна Дьокуускай куорат 31 №-дээх оскуолатын 10 физмат кылааһын үөрэнээччитэ Осипова Валерия  «Оранжевое настроение» аһаҕас дьарыгы, Арктическай оскуола 10 кылааһын үөрэнээччитэ Москвитина Евгения  устуоруйа уруогун, В.И.Кузьмин аатынан Дьокуускай 31 №-дээх оскуолатын учуутала Платонов Айсен Артемович физика уруогун, бу оскуола оҕо хамсааһынын салайааччыта Бакуменко  Любовь Игоревна дьоһуннаах кэпсэтии дьарыгын ыыттылар.

Иккис чааһыгар «Үөрэх тэрилтэлэрин педагогическай каадырдарынан хааччыйыы» диэн тиэмэлээх стратегическай сиэссийэ буолла. Сиэссийэни үөрэх министиэристибэтин исписэлиистэрэ иилээн-саҕалаан ыыттылар. Ол иһигэр Иван Егорович сиэнэ, министиэристибэ кадры бэлэмнээһин, судаарыстыбаннай сулууспа уонна юридическай хааччыйыы салаатын исписэлииһэ Мария Артемовна Москвитина.

Династия чилиэнэ, Иван Егорович улахан кыыһа, Сергеева Татьяна Ивановна, социальнай педагог идэлээх, аҕатын олоҕун, ситиһиилэрин сырдатар улахан быыстапката дьон болҕомтотун тарта. Онтон Сергеев Альберт Анастасович, Иван Егорович күтүөтэ, математика учуутала, виртуальнай быыстапка көрдөрөн, Захаровтар аймахтан тахсыбыт талааннах худуоһунньуктар үлэлэрин билиһиннэрдэ.

Сэминээр-практикум төгүрүк остуолунан, санаа атастаһыытынан түмүктэннэ. Тыл этээччилэр педдинастия уопутун сырдатыыга бэрт сонун тэрээһин буолбутун бэлиэтээтилэр. Чурапчы улууһугар 25 педдинастия баарын уонна бу ыытыллыбыт сэминээр салгыы сайдан иһэригэр баҕа санааларын эттилэр.

Марфа Далбаева, саха тылын, литературатын учуутала.