Зарина Борисова Арассыыйа успуордун маастара буолла

“Алмаасэргиэнбааҥҥа”  спортсменка Зарина Борисованы кытары көрсүһүүгэ  РФ успуордун маастарын бочуоттаах бэлиэтин туттардылар. Көрсүһүүгэ художественнай гимнастика  федерациятын бэрэсидьиэнэ Людмила Николаева, баан бырабылыанньатын бэрэссэдээтэлэ Николай Долгунов уонна баан кэлэктиибэ кытыннылар.

Зарина Борисова успуорт маастара буоларыгар уһун уонна дьаныардаах  12 сылын биэрдэ, кини Виолетта Никифорова (Ивановаҕа) дьарыктанан саҕалаабыта.

«Уопсайынан успуорт хас биирдии киһиэхэ, онтон олоҕун анаабыт киһиэхэ икки бүк улахан суолталаах дии саныыбын. Хас биирдии спортсмен успуорт маастарын  аатын ыларыттан үөрэр. Бу – өр сыллаах дьаныардаах  үлэни бигэргэтии. Бэлиэтээн эттэххэ, Саха сиригэр художественнай гимнастика олус түргэн хардыынан сайдар!  Биһиги Арассыыйа күрэхтэһиитигэр, чемпионатыгар, “Арассыыйа эрэллэрэ”, “Арассыыйа кубога” чемпионаттарга уо.д.а. күрэхтэһиилэргэ кыттар буоллубут”, — диэн кэпсээтэ Зарина Борисова.

Кыыс инникитин Кытайга үөрэнэр уонна БКЭ бэлэмнэнэр былааннаах. Салгыы олоҕун успуорду кытта ситимниэн уонна тириэньэр үөрэҕин баһылыан баҕарар.

Людмила Николаева көрсүһүү кэмигэр Зарина Борисованы үрдүк аатынан эҕэрдэлээтэ уонна баан үлэһиттэригэр федерация үлэтин, ситиһиилээх түмүктэр тустарынан кэпсээтэ.

«Баан өйөбүлүнэн, Саха сирин спортсменнара таһымнарын үрдэтэр уонна дойду сүрүннүүр исписэлиистэригэр эрчиллэр кыахтаннылар. Художественнай гимнастика  ааттаах-суоллаах бэрэстэбиитэллэрэ кыттар успуорт былаһааккатыгар эрчиллии үгүс киһиэхэ ыра санаа. Биһиги элбэх кэлэктииптээх бааҥҥа үтүө суобастаах, түмүктээх үлэҕит иһин махтанабыт. Баан хас биирдии исписэлииһэ  күннээҕи үлэтинэн  баан эрэ буолбакка, өрөспүүбүлүкэҕэ  художественнай  гимнастика сайдыыларыгар кылаатын киллэрсэр”, — диэтэ Людмила Валерьевна.

Николай Долгунов:

«Успуорт – бу дьиссипилиинэ, тулуур, бэйэни хонтуруолланыы, ахсаабат үлэ уонна ыарахаттары туорааһын. Зарина уонна федерация хамаандатын ситиһиилэриттэн, түмүктэриттэн үөрэбин. Биһиги спортсменнарбыт – “Азия оҕолоро” норуоттар икки ардыларынааҕы успуорт оонньууларын кыттыылаахтарын сыралаах үлэлэрин иһин махтанабыт.

Людмила Валерьевна уонна кини биир идэлээхтэрэ успуорт инфраструктурата,  тириэньэрдэр састааптара элбииригэр, ону сэргэ үгүс ахсааннаах административнай мэһэйдэри  туоруурга үтүмэн үлэни ыыттылар. Бу барыта Саха сирин оҕолорун туһугар оҥоһуллар. Биһиги салгыы бииргэ үлэлиэхпит”, — диэн баҕа санаатын тириэртэ.

Хаартыскаларга Дмитрий Ляшеев түһэриитэ.