«Зарница 2.0» байыаннай-патриотическай оонньуу ыытыллыаҕа

Бүгүн, олунньу 27 күнүгэр, өрөспүүбүлүкэтээҕи медиа-кииҥҥэ «Движение первых» уонна «Воин»  киин  бүтүн Арассыыйатааҕы «Зарница 2.0» диэн байыаннай-патриотическай оонньуу пресс-кэмпириэнсийэтэ ыытылынна.

Манна кыттыыны «Движение первых» эрэгийиэннээҕи салаатын сэбиэтин бэрэссэдээтэлэ Оксана Михайлова, «ЮНАРМИЯ» эрэгийиэннээҕи салаатын ыстаабын начаалынньыга Александр Кузьмин, СӨ Ыччат дьыалаларыгар уонна социальнай коммуникацияларга миниистири солбуйааччы Андрей Сосновскай уонна  «Воин» киин дириэктэрин солбуйааччы Афанасий Сергин, ону сэргэ Дьокуускай куорат  7-с №-дээх оскуолатын 11  кылааһын үөрэнээччитэ Никита Попов кыттыыны ыллылар.

СӨ Ыччат дьыалаларыгар уонна социальнай коммуникацияларга миниистири солбуйааччы Андрей Сосновскай:

— «Зарница 2.0» саҥардыллыбыт быраабыланан иккис сылын ыытыллар. Ол курдук, улуустарга олус сэргэхтик, тэрээһиннээхтик бу патриотическай оонньуубут ыытыллар. Бу сылга оонньууну Жатай бөһүөлэгэ саҕалаата. Былырыын оонньуу финалыгар Горнай оройуонугар көрсүбүппүт. Онно өррөспүүбүлүкэ бары улуустарыттан оҕолор кытта кэлбиттэрэ. Бу сылга өссө элбэх улууһу хабар былааннаахпыт. Быйыл оҕолору саастарынан түөрт бөлөххө арааран, ол курдук сэттэ саастарыттан сүүрбэ биирдэригэр диэри сүүмэрдиибит. Маннык оонньуулары үөрэх тэрилтэлэригэр, оннооҕор уһуйааннарга ыытар бэрт буолуо этэ дии саныыбын.

«Движение первых» эрэгийиэннээҕи салаатын сэбиэтин бэрэссэдээтэлэ Оксана Михайлова:

— Биһиги  үлэбит чэрчитинэн «Зарница 2.0» байыаннай-патриотическай хабааннаах оонньуу ыытыллар. Биһиги сүрүн сорукпут — ыччаты, оскуола оҕолорун,  устудьуоннары бу бырайыакпытыгар киэҥник хабан кытыннарар былааннаахпыт. Бу туһуттан көхтөөхтүк патриотческай хайысхалаах тэрилтэлэри кытта ыкса ситимнээхтик үлэлэһэбит. Бүгүҥҥү күҥҥэ «Зарница 2.0» оонньуу куорат уокуруктарыгар, өрөспүүбүлүкэ үгүс улуустарыгар ыытыллар. Бастыҥ хамаандалар муниципальнай түһүмэххэ кытталлар. Оттон кыайыылаахтар эрэгийиэн таһымыгар тахсыахтара. Быйылгыттан оҕолору саастарынан түөрт бөлөххө арааран кытыннарыахпыт. Кыра саастаахтар — 8-10 саастаах оҕолор, орто бөлөххө 11-14 cаастаах оҕолор, улахан оҕолор бөлөхтөрүгэр 14-17 саастаах оҕолор, анал бөлөххө 18-21  саастаах ыччаты хабыахпыт.