«Зарница 2.0» оонньуу кыайыылааҕынан Дьокуускайдааҕы педагогическай кэллиэс хамаандата буолла

«Зарница 2.0» байыаннай-патриотическай оонньуу эрэгийиэннээҕи түһүмэҕэр кыһыл көмүс мэтээли училищелар уонна кэллиэстэр устудьуоннарын ортолоругар Дьокуускайдааҕы педагогическай кэллиэс «ВОИН-ЯПК» хамаандата ылла. Кинилэр Саха сирин чиэһин Бүтүн Арассыыйатааҕы түһүлгэтигэр көмүскүөхтэрэ.

Үс күн устата Нам педагогическай кэллиэһин баазатыгар Саха сирин бары муннуктарыттан идэлээх үөрэх тэрилтэлэриттэн 23 хамаанда бастыҥ хамаандаатын аатын иһин кииристэ.

«Биһиги кыайыыга эрэллээх кэлбиппит. Күрэхтэһиигэ кыттарга эрдэттэн бэлэмнэммиппит, ону таһынан быйыл ыытыллыытыгар элбэх сонун уларыйыылары бэлиэтээтибит. Күннэр олус уустуктар этилэр эрээри, тэрээһин үрдүк таһымҥа ааста», — диир «ВОИН ВПК» хамаанда кыайыылааҕа Кристина.

Иккис миэстэни Дьокуускайдааҕы мэдиссиинэ кэллиэһин хамаандата, боруонса мэтээли Нам педагогическай кэллиэһин устудьуоннара ыллылар Төрдүс миэстэҕэ Цифровой технологиялар кэллиэһин Айтыын хамаандата, бэһискэ Автодорожнай тиэхиникумун хамаандата буоллулар, диэн СӨ ыччат дьыалаларыгар уонна социальнай коммуникацияларыгар министиэристибэтигэр иһитиннэрдилэр.

Хамаандалар 14 түһүмэххэ күрэхтэстилэр. «Күрэхтэһии үс күн устата олус түргэнник ааста. Олус элбэх түһүмэх буолла. Хамаандалар үчүгэйдик бэлэмнэммиттэр, кыайыыга эрэллээхтэр. Маннык байыаннай-патриотическай оонньуулар ыччаттар икки ардыларыгар ыытыллара хардарыта сибээстэһии күүһүрдэр, байыаннай уонна патриотическай бэлэмнэнии баазовай билиилэрин биэрэр. Күрэхтэһии таһынан тэрийээччилэр доҕордоһуу киэһэтин тэрийбиттэрэ, ыалдьыттары кытта көрсүһүүлэр буолбуттара», – диэн «ВОИН» успуорка бэлэмнээһин уонна патриотическай иитии киинин инструктора Максим Иванов кэпсээтэ.

Санатан эттэххэ, быйыл «Зарницаҕа 2.0» тоҕус муниципальнай уонна куораттааҕы уокуруктарыттан 23 хамаанда кытынна: Алдан, Нерюнгри, Бүлүү, Үөһээ Бүлүү, Мииринэй, Мэҥэ Хаҥалас, Нам, Жатай уонна Дьокуускай куораттан күрэхтэстилэр.
«Зарница 2.0» — бу «Бастакы хамсааһыннар» уопсастыба бырайыага. Быйыл саҥа технологическай оонньуу үс мөлүйүөнтэн тахса оскуола үөрэнээччилэрин уонна устудьуоннары түмүөҕэ. «Зарница 2.0» оскуола сүүмэрдиир түһүмэҕэр Саха сириттэн 27 тыһыынчаттан тахса эдэр киһи кытынна.