Заровняевтарга аналлаах Кыайыы Оһуокайын күрэһэ ыытылынна

Оһуокай өрөспүүбүлүкэтээҕи түмсүүтүгэр бүгүн, сэтинньи 21 күнүгэр, улахан тэрээһин буолла. Горнай улууһун бочуоттаах олохтооҕо, үлэ, тыыл бэтэрээнэ, норуот ырыаһыта, тойуксут, оһуокайдьыт Михаил Иннокентьевич уонна кини кэргэнэ, үлэ, тыыл бэтэрээнэ, Дьоруой Ийэ Марфа Васильевна Заровняевтар сырдык кэриэстэригэр анаан өрөспүүбүлүкэтээҕи  күрэс буолла.

Ытык ыаллар оҕолоро, сиэннэрэ төрөппүттэрин үбүлүөйдээх сылларыгар анаан быйыл бэһис төгүлүн күрэһи ыыттылар. Аҕалара төрөөбүтэ 100, оттон ийэлэрэ 101 сыллара буолбутугар анаан тэрийдилэр. Кинилэр сиэннэрэ, эһэтин утумнаан киэҥник биллэр оһуокайдьыт Прокопий Давыдович Федоров бу күрэҕи аймахтарын түмэн ыыппыта олус хайҕаллаах. Урукку сылларга нэһилиэктэригэр, улуус киинигэр тэрийбит буоллахтарына, быйыл Кыайыы 80 сылынан сибээстээн Дьокуускай куоракка ыыттылар.

Быйыл күн-дьыл хойутаан тоҥорон, суол аһыллыбакка да турдар, Тааттаттан Өлүөнэ эбэни туораан киирбит этээччи Илья Наумов оһуокай умсулҕана күүстээҕин, тардыһыылааҕын көрдөрдө. Эдэр уонна үтүөлээх этээччилэр тус туспа бөлөҕүнэн күрэстэстилэр.

Заровняевтар дьиэ кэргэттэрин туһунан суруйдахха, кинилэр улуустарыгар бастыҥ дьиэ кэргэн быһыытынан өрүү холобурга сылдьалларын Горнай МТ баһылыга Н.В. Андреев тоһоҕолоон бэлиэтээтэ. 12 оҕолоох дьиэ кэргэн оҕолоро, сиэннэрэ, хос сиэннэрэ кэҥээн, тэнийэн, биир тарбахха баттанар ыал буолаллар. Ийэлээх аҕалара 57 сыл устата бииргэ олорон, оҕолорун үөрүүтүн билэн барбыттара. Кинилэр олохторун 40-тан тахса сиэн, 120 хос сиэн, 20-ттэн тахса хос хос сиэн салгыыллар.

Аҕалара Михаил Иннокентьевич от үлэтигэр үрдүк көрдөрүүнү ситиһэн, үс төгүл «Москвич» уонна «Запорожец» маассыыналар фондатынан наҕараадаламмыта күн бүгүнүгэр диэри ахтылла сылдьар.

Бастыҥ ыал аатыгар сүгүрүйэн, сиэннэрэ Прокопий Федоров алгыһынан арчыланан баран оһуокайга күрэспит саҕаланна. Бастакы түһүмэх кэнниттэн алта этээччи финалга киирэн, сэрэбиэйинэн тиэмэлэрин тардан, тутатына хоһуйдулар. 18-41 саастаахтарга бастакы үрдэл аатын Эдуард Чоросов, иккис үрдэли Эрик Егоров, үһүс үрдэли Алина Дуюкова ылан харчынан наҕараадаланнылар. Үтүөлээх этээччилэргэ бастакы үрдэли Горнайтан Петр Сивцев, иккиһи Ньурбаттан Таисия Кучурова, үсүһү Дьокуускайтан Мария Иванова ыллылар. Кылаан ааты Тааттаттан Илья Наумов сүктэ. 50 тыһыынча солкуобайы Заровняевтар халыҥ аймахтара, оҕолоро, сиэннэрэ туттардылар. Бирииһи бары уу харчынан Заровняевтар оҕолоро, сиэннэрэ, хос сиэннэрэ кыттыһан туруорбуттар. Маны сэргэ анал ааттарга аймахтары сэргэ Оһуокай түмсүү, Маалтааны МТ дьаһалтата, Арчы Дьокуускайдааҕы духуобунай дьиэтэ, Горнайдааҕы култуура управлениета туруордулар. Кэлбит барыта илии тутуурдаах, өттүк харалаах барда. Күрэскэ кыттааччылар балаһыанньаны тутуһан, тиэмэни арыйыыга мастарыстыбалара таһымнааҕын көрдөрдүлэр. Толорооччу таҥаһа-саба, куолаһын кэрэтэ, уус-уран хоһуйуута, тылын чуолкайа, түһүлгэни тутуута, хаамыыта барыта учуоттанна.
Күрэһи сыаналааһыҥҥа Михаил Иннокентьевич, Марфа Васильевна кыыстара СӨ норуот хаһаайыстыбатын үтүөлээх үлэһитэ Е.М.Степанова, сиэннэрэ үтүөлээх этээччи П.Д.Федоров, Дархан этээччилэр М.Т.Николаева, В.В.Хорунов үлэлээтилэр. Дьон-сэргэ дуоһуйан, махтанан барда.

Марта Николаева