«Защитники Отечества» пуонда филиала арылынна

Бүгүн, ыам ыйын 30 күнүгэр, Дьокуускайга РФ бэрэсидьиэнэ Владимир Путин уурааҕынан байыаннай дьайыы кыттыылаахтарын өйүүр Судаарыстыбаннай пуонда «Защитники Отечества» филиала арылынна. Тэрээһиҥҥэ СӨ бырабыыталыстыбатын бэрэссэдээтэлэ Андрей Тарасенко, Арассыыйа Дьоруойа Александр Колесов уо.д.а. кыттыыны ыллылар. 

Пуонда бэс ыйын 1 күнүттэн үлэтин саҕалыахтаах. Манна уопсайа 30 социальнай исписэлиис (координатор) үлэлиэҕэ. Балартан 11 исписэлиис улуустарга үлэлиэ. Сыл бүтүөр диэри координатор-исписэлиистэр ахсааннара 120 диэри элбиэхтээх. Бу туһунан пуонда филиалын салайааччыта Алексей Александров санаатын үллэһиннэ:

— Пуондабыт бэс ыйын 1 күнүттэн үлэлиэҕэ. Бүгүн офиспыт арылынна. Ол курдук байыаннай дьайыыга сылдьар байыастарбытын, кинилэр дьиэ кэргэттэрин өйүүргэ анаммыт пуондабытыгар социальнай координатордар үлэлиэхтэрэ. Биһиги манна үлэһиттэрбитин сүүмэрдээн, талан ыллыбыт. Манна уйулҕа кэбиниэтэ, бибилэтиэкэ, оҕолорго аналлаах былаһаакка, ону сэргэ дьарыктаах буолуу сулууспата  баар буолуоҕа. Социальнай координатордар олус эппиэтинэстээх, байыаннай дьайыы кыттыылаахтарын, кинилэр дьиэ кэргэттэрин кытта үлэлэһэр дьон буолаллар. Кинилэр үөрэҕи аастылар. 19 координатор Дьокуускайга үлэлиэ. Онтон сорохторо улуустарга үлэлиэхтэрэ. Кинилэр хас биирдии байыаһы, кини дьиэ кэргэнин кытта үлэлэһэр соруктаахтар.

Салгыытын сиһилии «Саха сирэ» хаһыат кэлэр  нүөмэригэр ааҕаарыҥ.